CHAPTER IX.
Wythe these wordes, & other̛ suche, these heghe men̛ comforted̛ har̛ folk, for day schulden̛ hawe the bettyr wyll well for to fẏght. And whan̛ day were on̛ euery half redy for to smyth to-geddre, OConoȝwẏr, be-thoȝghthẏng that the aduentur̛ of battaylle ben ofte doutouse & mẏche vncerteyne, And as the whysman̛ seythe 'all tynge me shaƚƚ assay, rather̛ than̛ fyȝth,' & all-so he & hys doutenden̛ well sore to assemble with folke I-wepned̛, On al maner that he myȝght, [Fol. 5b.] He was abowte thame sholde make peas. thane, throgℏ besechyng̛ of goode mene̛ that went betwene, & throgℏ grace of the holy goste, was the peas y-made, on̛ þis maner; that thay sholde leve leynester to Maccmorghowe, & he sholde hitt holde of Oconoghour̛, & hym knowlech, & suget be to hym as to a kynge & prynce of Irland̛. And þat thys shold̛ be stydfastly I-hold, Macmorgh bẏtok hẏm hẏs sone to astage, by so, þat yf he good̛ pees hold̛, & trewlẏ hẏm helde, Oconghur̛ shold hẏm yeue hys doghter to wyff. Whan̛ thys was comynly I-shewed & I-knowe, & othes I-shwerne on̛ euery half, all thẏs trewly to hold, Another̛ thyng was bespoke bytwen ham, bott þat preuely, that Macmorgh ne shold̛ nomore brynge vnked mon yn-to the lond, & thay that he hade y-broght, as rathe as he had leynestre yn̛ good pees, he shold̛ anoon send ayenne home, & delyueryd þe lond of ham.