CHAPTER LV.
WNder this, laurence, Erchebisshope of Dyuelyne, (that at the consaylle of the latran hadde I-be, & as me seyde, ther he hadde purchased ayenys the kynge for loue of hys lond-folke, whar-of the kynge hadde grete ortrow vp-on̛ hym, wher̛-for̛ he lete hym of hys passage ynto Irland,) the xviij kalends of december, deyed at Oye yn normandye; a good mane and holy; & þat, gode almyghty sheweth, by many myracles þat he openly doth for hym̛. Me [Fol. 25a.] rede eke of hym, that he was seke thre dayes ar he thader come; and whan he sawe our̛ lady-chyrch, that ys the modyr̛-chyrch of the toun, he seyd thys vers of the psauter, as prophecye, throgh þe holy goste: 'Hec Requies mea in seculum seculi' et cetera: & ys thus mych to sygge an-englysshe, 'Thys ys my reste, world wyth-out end; her I wyll wonne, for I hyt haue I-chose.' ¶ Aftyr hym, was Erchebysshop of dyuelyne, Iℏon comyn, a man̛ of England borne; & yn England, at euesham, of the clergye of dyuelyn̛ (by queyntyse and procurment of the kynge), by on accorde I-chose; & of the pope lucye, at the Cyte of Wellet, ther̛-aftyr I-hodet & I-sacred; a man, good clerke & ryghtful; & by hys myght, mych ryght laked þe stat of holy chyrch yn Irland.