The University of Michigan Library provides access to these materials for educational and research purposes. These materials are in the public domain. If you have questions about the collection, please contact [email protected]. If you have concerns about the inclusion of an item in this collection, please contact [email protected].
DPLA Rights Statement: No Copyright - United States
Wnder this, as the lond of Irland was yn good pees vnder ham that weren In lefte, the lond for to kepe, byfelle that a day of parlement, at a certeyne place, was betaken by-twene hugℏ de lacy, whom the kynge had I-yeue dyuelyn to kepe with trust, And þe kynge of Myth. a nythe, whan the parlement shold ben a morow, a knyght that was Moryce fytz Geraudes neuew, & Robert Gryffyn by name, thoght yn hys
slepe that he saw a mych flote of wylde swyne yernynge vp-on hugh & moryce; & a boore amonge ham, myche & grysly ouer al other̛, come toward ham, & with hys tuskes wold haue smytten ham̛ & I-slawe, yf he stalwarthly ne had y-come betwene, & I-slawe the bore, & I-holpe ham bothe. A morow, thay went to þe place ther þe parlement was I-sette, at a place that me hath seth y-cleped 'rorykes hylle': ffyrst thay helden har parlement from ferr̛, by messagers goynge betwen̛; ther̛-after thay name sekernesse of othes I-sworne, & comen to-geddre by forward; natheles few, & ylych fale on ether̛ halue, and thay vnwepened,—bot the one, her swerdes; & the other̛, her̛ sparthes,—& ether of har folke somdel fer from ham. Gryffyn, that with Moryce was to the parlement I-come, was ful thought-ful of the vysyon̛ that he sawe. he name to hym seuyn̛ knyghtes of hys owne kyn, than that ho moost truste to har stalwardnesse, & drowen ham on the on halfe of the hylle, as neyght as thay myght leppen vpon har stedes, with sheldes about har̛ nekkes, & speres an-hond; & for a coste, pleneden & prykkeden har hors ayeyn̛ other, so that, yn whych halue the parlement turned, throght encheson of such pley thay myght be fonden Redy. Roryk & hugh helden har̛ parlement of many thynge; bot of nothynge thay myght nat accord, & begyn to departe a wrethe. The traytour Roryk had yn hys thoght þe trayson̛ þat he hadde I-purueyed. he made semblant, & draw hym by-halues as for to pyssen, & made tokens to hys men that thay hastely shold come to hym. Whan he thys hadde I-done, he turned ayeyne wyth hys sparth an hegh, hys wysage al blak with ful snel goynge. Moryce was Iwarned of hys neueu, of the vysyon̛ that he sawe; stod, & beheld al thys. he hent out þe swerd, & cryed vpon hugh, & mynyed hym, & dyd hym-self ayeyne the traytour, for to defend hym. The traytour ran to hugh, hym for to smyte; har latymer yed betwene hym & the dynt; & he smote hym of the oon arme, fast by the sholdre. Moryce stode, & campled wyth hys swerd ayeyne the sparthe, & lowd cryed to har men. & ar hugh myght be yn any state, hym-self for̛ to helpe, throgh grete hastynge, he felle twys [Fol. 15b.] abak; & vnnethe, throgh helpe of Moryce, that hym defendet thus, Hugh escaped wyth hys
lyf. The whyll that thys was, Rorykes men ful many come to hys clepynge, out of dales & wodes about, yernynge to ham wyth speres & with sparthes, for to brynge hugh & Moryce out of dawes. Than Gryffyn & hys felewes comen̛ yernynge vp on har hors styffly to ham. þe traytour̛ saw ham comynge, & lep to hors that to hym was broght, & wold do hym to flyght; & as he lepe, vp come Gryffyn̛, & wyth hys spere smote hym & hys hors throghout, & slowe hem bothe. Wyth hym wer̛ I-slayne þay that, yn so mych perylle, the hors hym broght; & hys heed I-smytten of, & yn-to england þer-after to the kynge I-sent; & al hys men yn-to al the feldes dyscomfyte, & I-slawe ful many. Rolf, Robertes sone fytz Stephen, was the other̛ stalwardthest that daye yn the felde [The twelve lines on the back of fol. 15, 'a bak (p. 74, at foot) . . . felde,' were first written by mistake on fol. 16, but afterwards struck out.] .