CHAPTER XXVI.
Whan þe kynge had thus I-do, he left at Waterford, Robert beranardesson̛, wyth mych meyne; &, by Ossery, name the wey toward dyuelyn̛. In that wyage, the kynge of Ossery came to hym, & yeld hym to the kynge; & whan he hade I-bydde awhylle at dyuelyn̛, theder̛ come Al þe heghest Iresshe-men̛ of leynestre, & besoghten pees, & yolden̛ ham to the kyng̛. Roryke O'conghour̛, the kynge of Connaght, ayeyns the kynges messagers at the watyr̛ shynnen,—that ys to wytten̛, hugℏ þe lacy & wyllyam Al-delines sone,—ther̛ he yeld hym to þe kynge; & the kynge of Myth Also; So that ther̛ nas none hegℏt man̛ yn Irland, that ne come to the kynges owne body, or sent messagers for to be-comen̛ hys man, & yeld hym to hym, sawe only thay of vlnestre. Than was fulfylled a prophecye that seynth Molynge seyd: "To-for̛ hym shall foot- [Fol. 13 a.] falle þe prynces, & trogℏ [A later overline h is above the tr of 'trogh.'] boxom-fastines [or 'fastmes.'] the lyme of pees shul vnderfonge." Merlyn seyd an-other: "Tho is lyght, the foules of the Iland shollen togedder fle; & the most of ham, with har wenges I-brant, shollen ouerthrowen yn thraldome; the fyf deles shollen be broght yn-to on, & the syxt shal ouercome the strengest places of Irland." Whan the mydwyntter came, many of the heghest comen to þe kynges court to feste; & myche wonder ham thoght of the noble seruice that þey þer saw, & of the myohe plente of mete & of drynke, of bordes I-sette, & fayr̛ clothes vpon; the hegh seruice of panetrye & buttellerie, & ryche vessels of gold & syluer̛; the many manere metes of kechen, on the manere of Englond, whych thay had neuer þer-to-fore I-sey. After that þe fest was heghly & fayr̛ I-hold, euery man went wyth gladnesse yn-to hys owne. In that tyme, weren̛ bowemen̛ at ffynglas I-horberowed, & wenten ynto chyrche haye, & hewen̛ adoun trees, that seyntes by old tyme hadden þer I-sete: þer came sodeyn̛ deth vpon ham, euerychon̛. [[See Giraldus's Topogr. Hibern. Opera, v. 135.]]