CHAPTER XVII.
Her-aftyr spronge tythyngges of the Erle & of þe englysshe-men̛ ynto englond; &, as maner ys, myche me made more; & that the Erl hade apropred to hym, nat only leynestre, bot other̛ londes also, that, by no ryght ne by law, to hym̛ ne to hys wyf longen̛. The kynge sent anoon, & forebeed that, 'out no lond that were yn hys power̛, ne shold no shyppen passe yn-to Irland, ne no maner thynge for to brynge; & al men̛ that yn-to Irland war̛ comen, shold ayeyn come yn-to englande, wyth-yn þe next estre, or̛ they sholden be dysheryted & exyled out of lond for euer.' The Erl saw that he & hys weren̛ narow belad, both of hys men that hym wold leue, & eke that nothynge ne most hym come out of other̛ landes, of þynge that hym nede was: by comune rede of hys men, he sent Reymond ouer to the kynge that was fer̛ yn gascoyne, & thus hym sent to say: "By thy leue, lord, yf y am welle vndyrstond, y went ynto Irland for to help thy trew man, Dermot Macmorgh; þerfor, that al that of hys herytage, other̛ of oþers yn þe lond, almyghty god me hath I-sent, as hyt come of thy graunt & of thy good wylle, also, I wyll that hyt to the turne, to do ther̛-wyth what the lyketh."