CHAPTER XI.
IN thys whyle, wax a grett wreth & a grete stryfe betwyx þe kyng̛ of Connaght, & donoll Obreyn̛, þe kyng of lymeryke, & of thomond. the kyng of connaght, Oconoghur̛, gaddered̛ hys hostes for to werr̛ vpon̛ Obreen. Obreen sent [Fol. 6a.] to mamorrowȝ, for allyaunce that was betwen ham, that he shold hym helpe. he spake þer-of to Robert & to Moryce, & bad ham that þay shold̛ go theder for to helpe Obreen. Thay name har men̛ wyth ham, & wenten ynto thomond̛, and ffonden̛ Oconoghur̛, that stryffly stode ayeyn̛ ham, & many fyghtes ham yaue. Bot the dysconfitur̛ turned vpon̛ Oconoghur̛, & many of hys men̛ wer I-sleyn̛, so that wythe shame he most turne ayeyn̛ ynto Connaght. And fro that tym, Obreen wythdrow hym from̛ Oconoghur̛, & neuer after was subyect to hym̛ as he was thar̛-by-fore; & the englysh hoste, wyth grett gettynges & with rych yiftes, turned ayeyne yn̛-to leynestre.