Here Beginnethe A Boke of Kokery.
Hare in Wortes.—Take Colys, and stripe hem faire fro the stalkes. Take Betus and Borage, auens, Violette, Malvis, parsle, betayn̄, pacience, þe white of the lekes, and þe croppe of þe netle; parboile, presse out the water, hew hem smaƚƚ, And do there-to mele. Take goode brotℏ of ffressℏ beef, or other goode flessℏ and mary bones; do it in a potte, set on þe fire; choppe the hare in peces, And, if þou wil, wassℏ hir in þe same brotℏ, and then̄ drawe it thorgℏ A streynour with the blode, And þen̄ put aƚƚ on̄ the fire. And if she be an̄ olde hare, lete hire boile weƚƚ, or þou cast in thi wortes; if she be yonge, cast in aƚƚ togidre at ones; And lete hem boyle til þei be ynogℏ, and ceson̄ hem witℏ salt. And serue hem forth. The same wise thou may make wortes of A Gose of a niȝt, [night. ] powdryng of beef, or eny other fressℏ flessℏ.
[folio 2b.]Buttered Wortes. ¶ Take al maner of good herbes that thou may gete, and do bi ham as is forsaid; putte hem on̄ þe fire witℏ faire water; put þere-to clarefied buttur a grete quantite. Whan̄ thei ben̄ boyled ynogℏ, salt hem; late none otemele come there-in. Dise brede smaƚƚ in disshes, and powre on̄ þe wortes, and serue hem fortℏ.
Cabochis. ¶ Take faire Cabochis, pike hem and wassℏ hem, and parboyle