An anthology of Chancery English

1454 SC8/28/1358 Petition of James, Earl of Wiltshire

To the full wyse and discrete Comons of this present parlement Sheweth vnto your notable discrecions and
wisdoms Iames Erle of Wiltshire and of Ormond That where he is seised in his demesne as in fee of þe Maner of Hukcote
with the Auowson of þe Chirche of Hukcote to þe seid Maner appertenyng and of a Croft called þe
litill mylne hamme with theire appertenaunces in þe Countee of Bukingham of þe yift and
feffement of Iames late Erle of Ormond fader of þe seid Erle of wiltshire and Iohn Neell Clerk And þat þe seid
Erle of wiltshire at þe reuerence of our blissed lord Crist jhesus and of his blissed moder our lady Seint Marie
and in worship of that glorious Martir Seint Thomas somtyme Archebisshop of Caunterbury of whos blode the seid Erle
of wiltshire his fader and many of his Auncestres are lyneally descended And the which glorious martir was borne of his moder
within þe ground where nowe is sette þe hous or hospitall of þe seid martir called Seint Thomas of
Acres within þe Citee of london / And also for þe grete tenderance trust and loue þat þe seid Iames
late Erle of Ormond on whom god haue mercy when he was on lyve hade vnto þat devout and holy place / and also for asmoche
as þe moder of þe seid Erle of wiltshire is beryed within þat holy place / is disposed agreed and fully
sette for hym and his heirs in consideracion of þe premisses and by þe agrement comfort supportacion
and assent of your full grete and notable wisdomes / that Iohn Neell nowe Maistre of the seid hous or hospitall
shall haue þe seid Maner of hukcote with the Auowson therto appertenyng and the seid Croft with their appert enaunces
to hym and to his successors for euermore to þentent that he and his successors shall fynde twey
prestes within þe seid hous or hospitall perp etuelly and dayly to pray for þe gode estate of our souerain
lord the kyng and of our souerain lady the Queene and of the seid Erle of wiltshire / And for the soules of our souerain
lord þe kyng and þe Queene when þey ben passed out of þis world / And for þe soules of the fader of
þe seid Erle of wiltshire and of his moder / And for þe soule of þe gode lady Dame Iohane Beauchamp late lady of
Bergeuenny grauntdame to þe seid Erle of wiltshire and for þe soules of all oþer his Auncestres þat ben
dede And for þe soules of þe seid Erle of wiltshire and of his wyfe and theire heires after þeir discece /
and for all Cristen Soules which entent and disposicion þe seid Erle of wiltshire may nat perfourme ne fulfille
without your speciall fauour help and socour be to hym shewed in þis behalfe Wherfore please it

your full
grete and notable wisdomes to considre þe premisses and to pray þe kyng our souerain lord þat he by
þassent of his lordes spirituell and temporell in þis present parlement assembled and by þe auctoritee
of þe same will ordeyne and establissh that þe seid Iohn Neell nowe maistre of þe seid hous or hospitall
or his successours may entre in to þe seid maner of hukcote with the Auowson aforseid and Croft with
þeire appertenaunces / And to haue and to holde þe seid maner and Auowson þerto appertenyng and Croft
with þeire Appertenaunces to þe seid maistre and his succesours foreuermore
without Interrupcion impediment or empechement of þe seid Erle of wiltshire or of his heirs or of any oþer
persone or persones pretendyng title by theyme or to þeire vse / in perfourmyng of þe gode entent and disposicion
aboue rehersid / Prouided alwey þat þis Acte statute or ordenaunce shall not exclude ne forbarre none oþer pers one
or persones of þeire title or right þat þey haue to þe seid maner with þauowson þerto
appertenyng and Croft with þeire appertenaunces but onely to exclude and forbarre þe seid Erle of wiltshire
and his heirs and all oþer persone and persones claymyng or hauyng title or right to þe seid maner with
thouowson aforseid and Croft with þeire apperte naunces to þe vse of þe seid Erle of wiltshire or
of his heires for þe love of god and in wey of charitee

[ [Printed RP V.257.57] ]