An anthology of Chancery English

Before 1424-26 C1/1/27 Petition of Willyam Midylton of Holderness, Yorkshire

To my graciouse Lorde of Wynchestre the Chauncellor of Engeland Compleines Willyam Midylton of Waughen
in holdernesse in als mykill als Iohn of Cotyngham gentylman of Waughen forsayde a with certeigne men of
his. wapynd & armed. yat es to say. Iohn of Waughen husbandman. Thomas warde husbandman (Robert of Bate) wryght.
& Iohn west wryght. wyth yair force of ye same Toune forsayde. maliciously agayne ye kyngis pece & (rebelliously) agayne ye
gouernours of ye deuyne seruyce of ye kyrk of Wanghen forsayde in seruyce tyme opon seint Steuyn
day ye last in ye (same) kyrke woulde haf slayn me with ane polle axe & all ye pepyll & ye preste so affrayde at ye
leuacion tyme clappyd saume ye buke for ferid. & I for drede of my dede habade still in ye same kyrk of seint peter
ffraunchiss .x. houreȝ lange & ye forsayde Iohan of Cotyng ham Iohn. Thomas Robert. & Iohn with yair force
en armed & wapened lygand

still in ane awayte in ye kyngis way & aboute ye same kyrke to haf slayne me if I had comyn oute
of ye kyrk. & no man durst him arest to ye pece. & yat same Iohn of Cotyngham proferd openly to ye
qwhylk of yam forsayde yat myght haf kylled me. soulde haf had xx. noblis for my dede als (it is) opynly knawen to
all yat toune & ye contreth. for ane worde I spak in ye kyrk. yat it wer better bell vnrogne at ye sauntes
tyme yan ye messe vnsogne. & I neuer sen yat day hidirward durst yer habyde in ye contree for drede of
my dede for yat Iohn of Cotyngham & his force forsayde. in harmyng & in costes of me & myne. xx li. Qwharfore lyke it to
yhour graciouse lordeschip in saueyng of my lyfe & ye kyngis pece & ye state of yat kyrke of seint peter
ffraunchess & my harmeȝ graunte a writ sub pena for yis for(sayd) Iohn of Cotyngham & his iiij. felaughes
in propir personeȝ to com by for yhour self. for ye luf of god & by way of charite (Another hand) Pleg' de persequendo Iohanes de Wayhen de Suggestan in Com' Ebor' Iohanes hakyns de london

[[Printed PC I.xx.] [faded] ]