Mappula Angliae [und] Zeitrechnung [Englische Studien 10 (1887)]

(f. 159: Cap. XV) and yaffe þe ovyr-comyne peple þe w^ch came w^t Rederyc þe norþe [MS. nourþe norþe.] parte of Albayne, þe whiche is clepid Cathenesye. The whiche peple wan∣tynge wyvis, for as moche as þei myghte non getyn of þe Brytoun nacioun, þei seylyd yn to Yrlonde and gat hem þere wyvys of þe Scottis, vpone þe condycyoun re∣hercyd by-forne. | Neuerþelees Seruius super Virgilium, as Girald remembrithe, clepithe þese Pictys Agatirsos, þe whiche haddyne firste hure dwellynge abowte þe marissche cuntree of Scicia; and he tellythe why þey ben clepid Pycti.... For þese Pycty, quod he, ben þe same pepille þe w^ch ben clepid Gothy. For when Maximus þe tyraunt went owte of Brytayne yn to Fraunce for to occupyen þe empere, and toke w^t hym alle þe chevalrye of Brytayne, Gracianus and Valen∣tinianus, brethryne, holdynge to-gedure þe empere, sentyn þese peple of Gothis as men welle expert in armys from þe marchis off Scicia yn to þe northe partis of Brytayne, for to vexyne þe Brytouns, | The w^ch by þe forsayde tyrant Maximus were made nakyd & bare of men of armys. And so þey, of pillers and predons made Man&yonarijs & dwellers, vsurpyd stylle þe same parte of Brytayne. | And Gaufrid yn þis matere seithe that Caraucius the tiraunt by gyle and disseite of þe Pyctis þe w^ch were comyne to helpyne Bassyan, slow Bassian, where-fore þe seide Caraucius for hure rewarde yaf þe Pyctis a dwellynge-place in Albayne; where medlyd w^t the Brutouns þey lyvyd longe yeris. | And yn as myche as þe Pyctis had occupied, as hit is saide be-forne, ffirste þe norþe partis of Albayne, hit semythe þat þe dewellynge-place þe whiche Caraucius yaffe to the Pictys was

þe sowþe parte of Albayne from þe walle of þe Romayns werke ovyr-thwert to the scottyss he see, In þe whiche parte is conteynyd Galoweye and Londeneye ... | But aftir, whan þe Saxouns comyne, they made thus parte of grounde to long∣yne one-to þe Norþe-humbirlonde in the place [l. province st. in the place.] þe w^ch is calde Bernicia, tylle þat Linadius [l. Kinadius.] Alpins sonne, kynge of the Scottis, distroyed þe Pyctis, & þe terry∣torye the w^ch is be-twix Twede & the scottysshe see, he annectyd to his kyng∣dam. ‖ And, as Bede seith li.^o I^o, by processe of tyme Scottis vndur Duke R(e)uda, goynge oute of Yrlonde þe whiche propirly is þe Scottis londe, or by ffrenschippe or by swerd gatte hem a dwellynge-place by-syde þe Pyctys ate the norþe place of the bosum of þe see þe whiche from þe weste brekythe vpp̄e a longe wey in to the londe and sum-tyme hit departythe [l. departyd.] the Brytouns from the Pictis; of þe w^ch Duke Reuda the Scottis were clepid Dalreudini... And thus Scottis aftur the (Britouns &) Pyctis addyd the III^de peple yn Brytayne. | But aftur-warde Saxouns, clepid yn by þe Brytouns to helpyne hem a-ȝenst þe Scottis and þe Pyctys, dryvyne þe Brytouns in to Cambriam and occupyenge þe londe by lytylle and be lytylle and dylatynge hure boundis on-to þe schottysche see, madyne þe fourthe peple of dwellers yn þís Ile. ‖ And for as moche. quod Beda li.^o 5^o Cap. 9^o, That Angli or Saxones the whiche þan dwellyd here, haddyn hur orygenalle [MS. orynenalle.] bygynnynge of Germanye, of þe w^ch Saxonye is parte, the Brytouns þe w^ch dwellyd neere hem clepid hem Germayns. Neuer-þelees abowte þe yere of grace VIII [MS. XVIII.] hundryd Egbert þe kynge of Weste-sex chargyd þat alle þe dwellers w^t-yn the londe schulde been callyd Angly, that is to say Englyssh men. | But aftur Danys neere II hundryd yere, from the tyme of þe seyde Egbert on-to þe tyme of seynt Edwarde, oppressynge thus lond and kepynge hit vndur grete subieccioun, maden þe V. newe peple yne þis Ile. | But they aftirward faylled anoon & were distroyed. Aftir þe w^ch tyme sōne, by duke William Ynglonde put yn subieccioun, þe Normannys rewlyd þis lond, & yett don, þe w^ch made the VI. nacioun inhabitynge thus londe. | Flemy(n)ggis also a grete nowmbre þe tyme of the firste Harry aryvynge at Mail∣ros, tooke hure dwellynge for a lytylle tyme at þe Est place [l. plage.] of Englonde and made (þe) VII. peeple yn þus yle. | Neuerþelees at the seide Herryis commaund∣ment þey were translatid on-to þe weste ynde of Walis & set þat Havyn-forthe [þat = at. MS. havyn forthe st. Haverford.] . And so now at þus dayes, þe Pyctis & þe Danys vttirly distroyed, Brytayne is oonly Inhabyted w^t þese V naciouns, as w^t Scottis yn Albayne, w^t Britouns yn Cambria or yn Walys, w^t Flemmynges yn West-Walis, w^t Normannys & Eng∣lysshe men myxte and medlyd yn alle þe Ile aftir [Tilge aftir?] . | And for as moche as noo cronycleere dowtythe how & by w^ch & when þe Danys &ecyd & were dystroyed yn þus lond, I passe ouyr for to tellyn hit here, and compendiously wylle tellyn howe þe Pyctis madyr an ende. ‖ Hit felle vpon a tyme, when the Saxouns occupyed þus lond and stabylle pees was made by-twyx hem and the Pictys, þe Scottis, þe w^ch comyn In Joynyd to the Pyctis, seyinge the Pictys, alle-be-hit þat þey of nounbre were fewere þen þey, yet yne manhode & armys þat þey were more famous þen þey: ‖ Anon þey envyed hem & ranne to hur custumable & cotidian armvre and as to here kyndely consuetude, prodicyoun, where-yn amonge alle nacyouns þey hane a syngulere preminence, & þat oone þis wise.

| They clepyd oo tyme oone-to a feste alle the grette & manly men and men of worshippe of þe Pyctis; þe w^ch alle sette at mete next þe deys vp-on fayre hyghe benchis, þe bordus alaste where-of were so ordeyned þat w^t drawynge owte of a fewe certayne pynnys on the bake halfe þey schulde sodenly fallyn downe yn to the benchis botyne. ‖ And so when at mete þey semyd moste mery, sodenly þe pynnys wern drawyn out and þey fyllen yn to þe hoole of the benche evyne to þe hammys; & forthe-w^t þe Scottis fylle vpon hem and slowe esche modris sonne. | And þis of þese II peeplys þe manlyere was fully distroyed & vanysshed a-wey, and þe more cowardly peple occupied þe Pictis londe & clepid hit aftur hur name Scotlond; þe w^ch þei possedyn yet in to þis day....