With an O and an I / [ed. W. Heuser].

Cambr. Caius Coll. 175.

1.

Incipiunt hic matutinas de cruce in anglicis [p. 118] uerbis transposit{us}.

Erly in a morewen þe Jewes Jesu gan take, Hys frendys and hys dysciplis sone hym hadde fforsake. þey beten hym and buffettyd hym and al nyȝt garte hym wake, [p. 119] Al þis suffryd Jesu Cryst ffor synful mennys sake. Wiþ an O and I, þer was a gret sorwe! Hou may man forȝete Jesu on euen and a morwe?

2.

Hora prima ductus est Jesus ad Pilatum.

At prime, forto deme Jesus to deþe, Pylate gan forþ drawe. Fals wytnesse bewreyeden hym off many a wykkyd sawe, þey spattyd in hys fayre face, as men wiþ outen lawe; Ne wolde þey neuere leue hym, tyl þey hadden hym slawe. Wiþ an O and an I, Jesus my lemman, Woo forbled is þy body, þy bryȝte rode was al wan. "Crucifige" clamitant hora III.

3.

At vndern, to do Jesus to deþe, lowde gunne þey crye; þey beten hym wiþ scourges kene, whyl þey myȝten drye; þey corownyd hym wiþ a þorn, þe blood ran to hys yȝe,

And maden hym to bere þe cros to þe mount off Caluerye, Wiþ an O and I, hys vysage þey al forbete, þere men myȝte for drede se blood off hys yȝen swete. Hora sexta Jesus est cruci conclauatus.

4.

At mydday he was naylyd, foot and hand, Jesus to þe roode; þey henge by hym twoo þeuys, as men þat were woode. Sory were Marye and Jhon, by hym þere þey stode; þey gouen hym drynke eysel and galle, Jesus, þat blysful ffoode, Wiþ an O and an I, as men þat were madde. For who so þynkes on þat sorwe, hou may he be gladde? Hora nona dominus Jesus exspirauit.

5.

At noon þyrlede hys syde Longeus [Ms. longe{us}.] , a blynde knyȝt; He wypyd hys eyen wiþ þe blood, þer wiþ he hadde hys syȝt. þe erþe qwook, þe stones schoke, þe sunne loste here lyȝt, Dede men resen out off here graue, þat was Goddys myȝt! Wiþ an O and an I, þat on þe rode vs bouȝte, For men þat were in helle for synne, Jesus out hem brouȝte. De cruce deponitur hora vespertina.

6.

At euesong Joseph and Nychodemus took hym off þe tree. Mary was so forweped, here sone myȝte sche nouȝt see.

Sone, sche sayde, wiþ þy fadyr in heuene is þy pouste; þou schalt ryse fro deþ to lyue, as þou seydyst to me. Wiþ an O and I, boþe god and man, þorwȝ þy deþ was blysse bouȝt þat lorn was þorwȝ Adam. Hora completorij datur sepulture.

7.

At complyn þre Maryes hooff hym [p. 120] and layde hym in a ston. Pylate bad off Crystys frendes, þey scholde leue non. He sette þre kynges [Ms. king{us}.] to kepe hym, awey scholde he nouȝt gon, And ȝit he ros from deþ to lyue ffor hem euerychon. Wiþ an O and an I, he ros from hem euerychon And schewyd hym to Marye Mawdeleyne and oþere many on.

8.

Pope Jh'on has grauntyd a ful fayr pardoun To alle þat þese matynys saye wiþ good deuocyoun, Or þat haue in mynde in herte off hys passyoun, A tweluemonþ [Ms. tueluemomþ.] in purgatorye off a ful remyssyoun. Wiþ an O and an I, Jesus, off þy grace þou sende vs here oure sustenaunse and in heuene a place.

Amen.