Page 285
I. Lucas.
1.
Luke in his lesson leres to me,
How Gabryel was graythed in gracyus degre;
Fro þe heuen upon hight hasted was he
To Mary, þat mayden, þat fair was & fre,
Wiþ ane O & ane I, vnto a cete
þat was named Nazareth in land of Galile.
2.
He marked [maked im Ms.] to þat mayden myghtful of mede
þat mowthed was Mary wiþouten mysdede,
þat wowed was wiþ Joseph worthly in wede,
And he of Dauid hows, if ye tak hede.
Wiþ ane O & and ane I, yhederly he yhede
Vnto þat berd bowsom his bodword to bede.
3.
Comly he knelt opon his o kne
And putt furth his fynger full fair to þat fre.
He said: hail, full of grace, god es wiþ þe,
Of all berdes þat bene blyssed mot þou be.
Wiþ ane O & ane I, asschamed was scho
And thoght: what euer menes þis message to me?
4.
Styll in a stody scho stode in hir stall,
þan said þe aungell: þou worthly in wall,
Be noght ferd in þis fare, if ferlyes befall,
Of god grace has þou geten gretest of all;
Wiþ ane O & ane I, sothly þou sall
Consayue a child ioyfull & Jesus him call.
5.
He sall be gracyus & gud & of gret myght,
And son of þe heghest here sall he hyght;
In þe sege of Dauid his sete sall be dyght,
And in þe hows of Jacob won sall þat wight.
Wiþ ane O & ane I, his ryche regne be ryght
Sall neuer lessen ne leue, bot last ay in lyght.
6.
Mary answerd & asked: how so suld bigyn?
I knew neuer in þis kyth kynde of mankyn.