II Ballade from MS. Cam. Univ. Lib. Ff. 1. 6, fol. 178, probably by the same author.
A mercy, fortune, haue pitee on me,
And thynke that þou hast done gretely amysse,
To parte asondre them whiche ought to be
Alway in on, why hast þou doo thus?
Haue I offendyd the, I? nay, ywysse; [ 5]
Then torne thy whele, and be my frende agayn,
And sende me Ioy where I am nowe in payn.
And thynke, what sorowe is the departyng
Of ij trewe hertes louyng feithfully,
ffor partyng is the most soroughfull thynge, [ 10]
To myn entent, that euer yet knewe I;
Therfore I pray to the, Right hertely,
To turne thy whele & be my frende agayn,
And sende me Ioy where I am nowe in payn.
ffor tyll we mete, I dare wel say for trouth [ 15]
That I shall neuer be in ease of herte,
Wherfor I pray you to haue of me summe Routh
And release me of all my paynes smerte.
Nowe sith þou woste hit is nat my deserte,
Then torne thy whele And be my frynde agayn,
And sende me Ioy where I am nowe in payn.