CAP. IV.
Also freris seyn, if a mon be professid to hor holy ordir, [and of for∣bidding him to preach publicly though God may be strongly moving him to do so.] he schal not preche frely and generaly þo gospel to Cristen men withouten license of his sovereyne for virtue of obe∣dience, be his sovereyne nevere so cursid mon of lif, and unconnynge of Gods lawe, and enemye to Cristen monnis soule, and, in caas, a foule devel of helle,—þof þis mon pro∣fessid have resseyved of God nevere so myche connynge of Gods lawe, and power and wille to wurche after þis connynge. And so þis mon schal nedis be dampned for mysspendynge of Gods tresoure; ffor siþ Gods lawe seis þat he is oute of charite þat helpis not his broþer with bodily almes, if he may, in his nede, myche more is he oute of charite þat helpis not his broþers soule wiþ techinge of Gods lawe, when he sees hym renne to helle, ȝhe, by ignoraunce. And þus to magnyfie and mayntene hor roten sectis, þei neden men by ypocrisie, fals techinge, and stronge peynes to breke Gods heestis and leese charite. Oute on þis fals heresie and tirauntrye of Anticrist, þat men ben nedid strongly to kepe more his lawes, and obeeche more to hom, þen to Cristis comaundements evere rightful!