A chronicle of London, from 1089 to 1483; written in the fifteenth century, and for the first time printed from mss. in the British museum: to which are added numerous contemporary illustrations, consisting of royal letters, poems, and other articles descriptive of public events, or of the manners and customs of the metropolis.

NOMI'A MAIOR' ET VICECOMITU' LONDON' TEMPORE REG' HENR' QUINTI, QUI CORONATUS FUIT APUD WESTM' NONO DIE MENSIS APRIL ANNO D'NI MILL'MO ccccxiij.

Will' Crowm'e [[See note CC.]] , drap', maior. John Nicholl, vynt'. John Sutton, groc'.

Anno primo.

In this yere, on seynt Edmondes day the kyng, there was a gret convocacion of clergye at Poules in London, whiche con∣tenued tyl the iiij day of Decembre; and thanne was the kyng and his counseill accorded to fette the bones of kyng Richard [Kyng Richard boones were feet fro Langeley and beried at Westm'.] fro Langele to London, and to berye them at Westm' [[See note DD.]] ; and there was don a dirige ryally; and on the morwe the masse was solempny songon. And on the Soneday sewyng, Thomas Arundell erchebysshop of Caunterbury and manye othere

bysshoppes, at the crosse of Poules accursed S^r. John Old∣castell lord of Cobbeham and alle hise mayntenours. And in the xix day of Decembre cam the Frensshe ambassatours to London, fro the kyng of Fraunce to the kyng of Engelond. Morover in the twelfthe day in Cristemasse it was certefied the kyng, that S^r. John Oldcastell was up with a stronge peple ayeyns hym. Wherfore the kyng be hys counseill cam to Lon∣don the viij day of Januar'; and with hym cam hise brethren, and the erchebysshop of Caunterbury, and Courtenaye the bysshop of Norwych, and manye othere lordes and bachelers. And the nexte nyght the kyng with hyse brethren and the bysshopes token the feld ayeyns Sire John Oldcastell, beyonde seynt Gyles in Holborne, betwen Westm' and the highe weye toward Tyborne; and there the kynges peple token diverses men as they comen be the weye, of whiche on was a squyere of S^r. John Oldcastell, and othere diverses men also: and there was muche folk arested and put into the Tour of London, of whiche folk there were xij men drawen fro the Thoure of London as a Fryday at nyghte thorughe the town to Neugate, and there they were tyl on the morwe; and they with othere xxv men, that is to seye xxxvij persones, were drawen, hanged, and brent; and tho that were drawe were said arrysers ayeyns the kyng: and certaynly the said S^r. John Oldcastell with gret multitude of Lollers and heretykes were purposyd with ful wyll and myght for to have distroyed the kyng and hyse brethren, whiche ben protectours and defendours of Holy Chirche, and them also that ben in degre of holy ordre in the service of God and of his chirche, the which will and purpos, as God wolde, was lette; and

S^r. John Oldcastell fledde and escaped. Forthermore in this yere the xix day of Feverer, deyde Thomas Arundell the erche∣bysshop [Obiit Tho∣mas Arundell arch'ep'us Cantuar'.] of Caunterbury. Also in this yere was a parlement at Leycestre, and there was the lord John the kynges brother mad [A parlement at Leycestr'. John the K. brother duke of Bed∣forthe.] duke of Bedeford and erle of Kendale, and the lord Humfrey hys brother was mad duke of Gloucestre and erle of Pembroke, and S^r. Richard the dukes brother of York was mad erle of Caumbregge. And in this yere in the monthe of Juyll wente [Humferey the K. brother duke of Glowcester.] oure ambassatours into Fraunce, and some of the ambassatours wenten into Constaunce to chesen the pope: and some wenten to the emperor; that is to seye, to the emperor wente the erle of Warwyk, the lord Fitz Hugh, Sire Walter Hungerford, S^r. Rauf Rocheford, Maistre Philipp Morgan, Maistre John Henyngham, with comission. And to the cytee of Constantyne wente the bysshop of Bathe, the bysshop of Salesbury, the bysshop of Chestre, the abbot of Westm', the abbot of York, the abbot of Gerseye, with othere doctours. Also into Fraunce wente the bysshop of Dorham, the bysshop of Norwych, the erle of Salys∣bury, the lord Grey Codonore, S^r. John Pelham, Robert of Waterton, and othere. Forthermore on the Monday the xxiij day of Septembre began a grete counseill at Westm'; and on the neste Monday after, that is to seye the firste day of Octobre anno d'ni mill'mo cccc^mo xv. Also the same yere was S^r. Herry [Chicheley B. of seynt De' mad arche∣bissh' of Canterbury.] Chicheley bysshop of seynt Davyes mad erchebisshop of Caun∣terbury, and S^r. Richard Courtenay mad bysshop of Norwych. And in the same yere on seynt Marie Maudeleyn day, John [Nyauncer took seynt Anne chirch for scleyng of S^r. John Tybbay.] Neauser squyer, and his men, sclowen Maistre John Tybbay clerk, as he passed thorugh Ladlane; for the whiche deth the

same John Nyauncer and iiij of his men fledden into seynt Annes chirche withinne Aldrichgate; and withinne the same chirche they were mured up, and men of diverses wardes watched them nyght and day. And the forsaid John Nyauncer and his men forsuoren the kynges lond, and passyd thorugh the citee of London toward Caleys in there schertes and breches, and ich of them a crosse in there hand.

Thomas Faucon', drap', maior. John Michell, fysshmong'. Thomas Aleyn, m'c'.

A^o. s'c'do.

In this yere was Sperepoynt drawe and hanged for counter∣fetynge of the kynges seall. Also in this yere John Claydon skynner, and Richard Turmyne bakere, were brent in Smythfeld for heresye. And on the iiij day of March after, was the pardon of the lord Cobbeham, that is to seye S^r. John Oldcastell, pro∣clamed. On Palme Soneday the xvj day of March was William Elys sone brought out of the Tour of London be comaundement of the kyng, and delivered to the said maire for to kepe hym in warde, and specyally in yrens, for tales that he hadde told of the kyng; and also for the peple seyde that they myghte non yren fetres no lokkes holden hym; and there he was cheyned to an yren post at the countor gate in Chepe, ayens the Standard. Also the same yere was the kynges grete werk begonne at Shene; [The grete werk of Shene was begonne. Newe gates in London.] and in hys tyme was mad newe g'tes at London wall, and a newe gate, and the prevy that stod withinne the more was drawe doun and set on this syde of the wall over the comown dych that comyth out of the more. And in his tyme [[i. e. the third year of his reign. See note EE.]] the kyng made his vyage toward the costes of Normandye; and he rood thiderward

thorughout the citee of London toward the town of Hampton, that is to weten the xviij day of Juyn, the yere of his regne the thridde begynnyng; and at Hampton he lay stille for to abiden his retenue and his stuff that longith for werre: and in his lyenge there, the Moneday the v day of August next after were put to dethe there Sire Richard of Yorke erle of Caumbregge, [The deth of lordes at Hampton.] the lord Scrop that tyme tresorer of Engelond, and S^r. Thomas Gray knyght, for treturye and ymagynyng of the kynges deth. And in the same yere on the morwe after seynt Laurence day, the xj day of August the Sonday, the kyng and alle his retenue schipped iij houres after noon at Portesmouth, toward the town of Harefleu in Normandye; and he landed at Kedecaux iij myle out of the town of Harfleu on oure lady even the assumpcion, the xiiij day of August. And the kyng began to leye his sege [Sege of Harfleu.] to the town of Harfleu the xvij day of August: and the kyng lay there at the sege fro the same xvij day of August unto the xxij day of Septembre or the town were yolden up; and his lyenge there aboughte the town there dyed many on of his retenue, that is to weten, the erle of Suffolk, the bysshop of Norwych, Courtenay, S^r. John Philip, and manye othere knyghtes and squyers, and othere comoun peple whiche were nought nombred. And the same xxij day of Septembre the toun of Harfleu was yolden up to the kyng, and alle the keyes [The yeldyng of the toun of Harfleu.] of the toun brought to hym: and the kyng abode tyl the laste day of Septembre, til that he hadde mad governaunce withinne the twon: and he made his Em [[Sic, query "uncle." The lord Beauford capitayn.] the lorde Beauford the erle of Dorset, captayn of Harfleu. And the Tuesday the firste day of Octobre the kyng toke his weye fro Harfleu toward his town of

Caleys, with the noumbre of viij^l fytyng men: and the Frenssh∣men of Fraunce broken there brigges and pyled the forthes of the water of Some and othere diverses wateres, that the kyng myghte nought passe but with moche disese til he com to the water of Swerdes; and there the kyng and his oost passyd over. And on the xxv day of Octobre was Fryday, and seynt Crispyn and Crispianiani day the lordes and the chyveteynes of Fraunce lay with a gret oost enbatailed to the noumbre of vi^xx m^l, and wolde a stopped the kynges weye that he schulde nought a passed to his town of Caleys. And the kyng with his oost batailed hym ayens the Frensshmen, and manfully he faught ayens them in a feld that is called Aigincourt, and sclowe and [The bataill of Aigincourt this day.] toke of them of dukes, erles, barons, knyghtes, and cheveteyns to the noumbre of xij m^l; and of the comown peple mo thanne the noumbre of iij m^l, that is for to weten, the duke of Orlyons and the duke of Burbon, the erle of Vendon, the erle of Ewe and the erle of Richemond, with S^r. Bursegaunt; and there sclayn the duke of Launson, the duke of Braban and the duke [Mort.] of Bare, and the erle of Navers, the lord de la Brytte constable of Fraunce, and the seneschall of Henaude, with manye othere lordes, knyghtes, and squyers, and worthy men v m^l and mo. And on oure syde were sclayn the duke of York, the erle of [Mort.] Suffolk, and S^r. Richard of Kyghle, and David Gamme squyer, with a fewe mo othere persones to the noumbre of xviij. And the xxix day of Octobre, the morwe after seynt Simondes day and Jude, the same day the newe meire schulde ryde and taken his charge at Westm', the same day erly in the morwe comen tydynges to London while that men weren in there beddes,

that the kyng hadde foughton and hadde the bataille and the feld aforseid. And anoon as they hadde tydynges therof, they wente to alle the chirches in the citee of London and rongon alle the belles of every chirche; and solempnely alle the prestes [Alle the bellys of London were ronge for yoye.] of every chirche, and othere men that were lettered songen Te deum Laudamus, &c. And ayens ix of the belle were warned alle the ordres of relygeous men of the citee of London, for to go a procession fro seynt Poules unto seynt Edward schryne at Westm'. And the newe maire and hise aldermen with alle the craftes of London, and the quen with alle here lordes also wente from seynt Poules unto Westm', and offred at seynt Edwardes schryne aforeseid, or the meire tok his charge; and whanne the meire hadde taken his charge, every man come rydyng hom from Westm' on horsbak, and were ioyful and glad for the goode tydynges that they hadde of the kyng, and thankyd oure lord J'hu Crist, his modir seynt Marye, and seynt George, and alle the holy company of hevene, and seyde Hec est dies quam fecit d'n's.

Nicholl Wotton, drap', maior. Alan' Ev'ard, m'c'. Will' Caumbregg, iremong'.

A^o. iij^o.

In this yere began the generall counseill at Constaunce. Also in this yere, that is to say the xxviij day of Octobre, the kyng com to his town of Caleys, and was there til the xvj day of [The comynge of oure kyng to Caleys.] Novembre: and that same day the kyng schipped fro his town of Caleys toward Engelond, and he landed the same day at [The landyng of oure kyng at Dovorr.] nyght at Dovorr, and com forth alle the woke after toward London: and the Fryday at nyght the kyng come to Eltham,

and there he lay al that nyght; and on the morwe was Satyrday, the xxiij day of Novembre, the maire of London and alle the aldermen, with alle the craftes of London, reden every man in reed, with hodes reed and white, and mette with the kyng on the Blakeheth comyng from Elthamward toward his citee of [The comyng of oure kyng to London.] London; and ayens his comynge was ordeyned moche ryalte in London, that is to weten at London bregge, at the conduyt in Cornhill, at the gret conduyt in Chepe, and at the crosse in Chepe was mad a ryall castell, with angels and virgynes syng∣ynge therinne; and so the kyng and hise presoners of Frenssh∣men reden thorugh London unto Westm' to mete, and there the kyng abod stille. And on the morwe after, it was Soneday [The maire and the aldermen presentyd the kyng with a m^l li in too basyns of gold worth v^c li. Sigismund the emperor of Almayne com to London.] and the xxiiij day of Novembre, the maire and alle the alder∣men, with too hundred of the beste comoners of London, wente to Westm' to the kyng, and present hym with a m^l pound, in too basynes of gold worth v^c li. And in this tyme the emperor of Almayne com into Engelond with viij^c hors to seynt George feste; that is to wete, the firste day of Maij, at nyght, he landed at Dovorr; and on the Satyrday, the seconde day of Maij, he cam to Caunterbury and bod stylle there unto the v day of Maij: and the Thorsday, the vij day of May [[See note FF.]] , the maire and alle the aldermen, with alle the craftes of the citee, reden alle in rede gownes, and hodes white and reed, and mette with the emperor on the Blakehethe; and the kyng and alle hise lordes mette [The metyng of the kyng and the emperor.] with hym at seynt Thomas Wateryng, and there the kyng put hym on the right hond, and the erchebysshop on the left hond, and so they come rydynge thorugh the citee of London and

forth to Westm': and the xxix day of Maij the duke of [The duke of Holand com to London.] Holand come to London, and he lay at the bysshopes place of Ely in Holbourne; and he abod stylle there unto the xxj day of Juyn. And the xxvj day of Juyn the emperor remeved [The re∣movyng of the emperor.] fro Westm' toward the castell of Ledes in Kanc', and from the castell of Ledes unto Eltham, and from Eltham forth to Caun∣terbury; and he schipped out of Engelond the xvj day of August. And the same yere the kyng wente to Caleys for to [The kyng wente to Caleys for trete with adversaries of Fraunce.] trete wyth his adversarije of Fraunce: and the same yere the duke of Bedford, the kynges brother, was mad capitayn of the see for a quarter of a yere; and the same tyme he and his retenue took iij carykes and drowned the forthe, and a gret hulke was drowned also: and anon after, in the same yere, was taken a gret carryke at Dertemouth. And in this same yere, that is to weton on the Mighelmesse day, was Benet Wolman drawen and hanged, and his heed smyten of and set on Lon∣don bregge for tretory: and in the same yere, the viij day of Octobre, was a p'chemyn' of Trille melle strete drawen and hanged, and his heed smyten of and set upon London brigge for tretory: and in the same yere weren alle the Galy half [The galy halfpence were stroyd.] pens fordon at a parlement holden at Westm', the whiche par∣lement began the xv day of March. Also in the same yere, that is for to seye in the begynnyng of the forthe yere of the reigne of kyng Herry the fyfthe, the duke of Bedford and the [Bellu' sup' mare int' I. ducem Bed' et adv'sar' reg'.] erle of March, with othere certeyne lordes and there retenue, foughton with vij carykes of Jene, and with aboughte l othere vesselles, some hulkes, some barges, some galys, and some

galyottes; of whom, blessyd be God, he toke iij carykes with there patrons, and drowned a gret hulke that was called the Blake hulke of Flaundres, and the remenant fledden there wey: and this was don upon oure lady day the assumpcion, the iiij yere above seid.

Herry Barton, skynn', maior. Rob't Wydyngton, groc'. John Coventr', drap'.

A^o. iiij^o.

And in this same yere was a parlement at Westm' holden, [A parlement at Westm'.] and it began the xix day of Octobre; and at that parlement was the erle of Dorset mad duke of Excestre: and in this same yere, on seynt Katerine even, was a begger drawen and [A begger was drawen for disfi∣guryng of children.] hanged for dysmembrynge of yonge children, and he was drawen in his owne carre from the Leden halle unto Tyborne: and in this same yere was a theff sclayn, withoughte seynt Marie Spytell, that highte Robert Somerford: and the same yere held his Cristemasse at Wyndesore: and the same yere were too women hanged at Tybourne; that oon was a spycer wyf of Seynt Albons, and that other was the baillyf wyf of [Thomas Pedwardyn kepere of Sprottes keye was sclayn on Estreday.] Vynesbury; and the same yere was the same bally hanged: and the same yere was Thomas Petwardyn, kepere of Sprottes keye, sclayn in seynt Dunston chirche in the Est, in the hyghe chancell, on the Esterday at evesong tyme, with the lord Straunge and his men, and there was S^r. John Trussell and hise sone, and othere men of his, sore wounded; and that fray began betwen the lord Strange wyf and Sire John Trussell [The bataill on the see betuen the erl of Hunt' and the kynges adversaries.] wyf: and the same yere, upon seynt Petyr day and Poule, the erle of Huntyngdon, with othere certeyn lordes and there

retenue, foughten with ix carykes of Jene, the grettest that evere were seyn in this coostes, and scomfited them; of whiche, thanked be God, he toke iiij grete with there patrons, and the admirall of them alle was called the bastard of Burbon, with alle the tresoure that they alle schulde aben waged with for a quarter of a yere; and the othere carykes fledden awey. Also the same yere, the xxx day of Juyll, the kyng with alle his oost seyled into Fraunce, and londed in Normandye, upon Lammes day, a litell besyde the castell of Touke; the whiche castell he [The castell of Touk with the toun was yolden.] toke first after he was landed, and yaf it to his brother the duke of Clarence, with alle that longith thertoo [[See note GG.]] . Also the same yere, that is to say anno quinto, the kyng gat Cane Beyeux, [Cane was goten and manye othere townes and castelles.] and manye othere townes and castelles and riche abbeys, longe before seynt Edward day.

Ric' Merlawe, irmong', maior. Herry Rede, armerer. John Gedeney, drap'.

A^o. v^to.

In this yere the generall counseill was ended at Constaunce, and an unyte mad in Holy Chirche; and a pope chosen on seynt Martyn day, be fre eleccion and comowne assent of alle the generall counseill cristen, whiche pope was called Martinus quintus. Also in this yere, on the feste of seynt Lucie the virgyne, the yere of oure lord a m^lccccxvij, S^r. John Oldcastell [S^r. John Oldcastell was taken in Walys.] lord of Cobbeham was taken in the march of Walys, and brought to Westm', where he was forjugged; and he was drawe thorugh the citee of London, which in his dayes was heed of heretykes and Lollers; and he was hanged be a cheyne of iren, and was brent up the galawes and alle [[See note HH.]] .

Will's Sevenok, groc', maior. John Bryan. Rauf Barton, skynn'.

A^o. vj^to.

The whiche John Bryan, schirreve of London [["was mis∣chevously drowned at Seint Kate∣rines mille as he went to eas hym" in the Cotton MS.]] , fell in the water of Thamyse, the whiche was cause of his deth, and dyed on the x day of Octobre; and in his stede John Perneys was chosen for the remenaunt of the yere. Also the same yere the kyng of Engelond with his lordes beseged the citee of Roen [[See note II.]] , the whiche sege dured half a yere and more; but at the laste, thorugh the grace of God, it was yolden to hym upon the day [The sege of Roen.] of seynt Wolstan, alle ayens there will, God wot, for nede com∣pelled them therto for defaute of vitaill; for as it was seid there deyde withinne the town for defaute of vitaille, mo thanne xxx m^l durynge the same sege. Also in the same yere the dolphyn of Fraunce sente after the duke of Burgoyn, to whom, as men seyn, nought fully vij nyght before he was sworn un on Godes [Sacr'm ducis de Burgoyne.] body sacred to ben good and trewe for to come and speke with hym be syde Parys, at the town of Monstreux, with certeyn persones undir sauf conduyt; and whanne he cam thedir, not∣withstondyng the gret othe that was mad betuen them bothe, nother his sauf conduyt, the viscount of Burbon, as the duke kneled before the dolphyn, smot hym with an ax in the heed; [The duk of Burgoyn was sclayn.] and so that the forseid dolphyn and hise complices falsly and untrewly, and ayens alle manere lawe of armes, morthered the forseid duke and made an ende of hym. Also this same yere frere Randolf, a mayster of dyvynyte, that sumtyme was the [Frere Ran∣dolf.] quene Johanne confessor, at the excitynge of the forseid quene, be sorcerye and be nygramancie wrought for to astroyd the kyng: but, as God wolde, his falsnesse at the laste was aspyed;

wherefore be comown parlement the quene forfetyd here landes.

Ric' Whytyngton, m'cer, maior. John Boteler, m'c'. Rob't Whytyngton, drap'.

A^o. vij.

This same yere was the kyng Herry the fyfthe mad heir and regent of Fraunce, and wedded to dame Katerine the kynges [The wed∣dyng of the kyng and quene Kateryne in Fraunce.] doughter of Fraunce, at Troys [[See note KK.]] in Champayn, upon Trynyte Soneday; and anoon after he hymselfe and hise lordes, with the duke of Burgoyne and manye othere ryalles of Fraunce, wenten and leyd sege to manye diverses citees, townes and castellys, [The sege of Melau and of manye mo citees, townes and castell.] whiche weren holden with the dolphyns men and Armenakes, and wan them; but Melau sur Seyne was on of the werste that evere he leyde sege to, for ther was inne a schrewd meyne of rebelles.

Will's Cambregge, groc', maior. John Boteller, drap'. John Welles, groc'.

A^o. viij^o.

This yere on Candelmasse day be the morwe the kyng come into Engelond with hys quene, and landed at Dovorr; and on the xiiij day of Fever, upon seynt Valentynes day, the kyng come to London; and the xxj day of the same monthe [The coro∣nacion of the quene at Westm'.] the quene come to London; and on the xxiij day of the same monthe sche was crowned at Westm' [[See note LL.]] . Also this same yere, anoon after Estren, the kyng helde his parlement at Westm'; in whiche parlement was ordeyned, that no man after Cristemasse [A parlement at Westm'. The kyng ordeyned certeyn weyghtes for gold.] thanne nest folwynge schulde putten forth no proffre no gold in payment but yf it held the weyte, wherfore the most part of

the peple ordeyned them balaunces and weytes. And anoon after Pentecost the kyng seiled over the see to Caleys, and passyd forth into Fraunce. This same yere upon Estre even afore noon, that is for to say the xxij day of March, the yere of oure lord a m^lccccxxj, the duke of Clarence with manye other [The deth of the duke of Clarence.] lordes were sclayn beyounde the water of Leyre in Fraunce; and manye lordes were taken prisoners the same tyme, of the whiche the erle of Hunt', and the erle of Somerset with hys brother, were principales. Also the same yere, betuen Criste∣masse and Candelmasse, the town of Mileu' was yolden to the [The town of Mileu was yolden.] kyng, and alle cheveteyns with the sowdyours were ledd to Parys in the croke of the mone they myght seyn, for of them there skaped thens but fewe on lyve.

Rob't Chycheley, groc', maior. John Weston, drap'. Ric' Gosselyn, irmong'.

Anno ix^o.

This yere, on the thridde day of December, began the par∣lement at Westm', whiche was holden be the duke of Bedforde, thanne lyftenaunte of Engelond; in whiche parlement was graunted a quynzyme and a dyme, the kyng hymself thanne [A parlement at Westm', and a xv^me and a dyme graunted.] lyenge at the sege of Mieux in Bry', in Fraunce, the half of whiche xv^e and x^me to be payd at the purification of oure lady nest folwynge, and that the kynges deputes schulde resceyve in payement swyche gold as wente; that is to seye, zif a noble were worth v s. viij d., the kyng schulde taken it to the value of vj s. viij d.; and if it were lesse than v s. viij d., thanne the per∣sone so payenge that money schulde make good the surplus to

the value of v s. viij d. to the kyng, in contentyng the kyng of the hol noble of vj s. viij d.; and in cas the noble so paied were better of value thanne v s. viij d., it was accorded that the kyng schulde paye to the awnere therof the overplus above v s. viij d.: also thanne was gret scarcete of whit moneye in Engelond, that is to seye of sylver, for every man, because of the said newe eschange, outred gold and kept sylver in as moche as they myghte. Also in the forseid monthe of Decembre, on seynt Nicholl day, the yere of oure lord a m^lccccxxj, Herry the [The birthe of kyng Herry the vj^te.] kynges sone was born at Wyndesore, whos goodfadres at the font were Herry bysshop of Wynchestre, sithe Cardynall, and John duke of Bedford, and Jacomyn duchesse of Holand was hys goodmodyr; and his goodfadir at his confirmacion was Herry Chicheley erchebysshop of Caunterbury. Also in the monthe of May [[See note MM.]] , the yere of oure lord a m^lccccxxij, and of the kyng the x yere, the citee of Mewes in Bry', whiche longe [Mewes in Bry' was yolden.] tyme hadde be seged, was yolde to the kyng. Also the same yere, the xiij day of August, the newe wedircock was set upon [The newe wedercock of Poules was set up.] Seynt Poules stepill of London: and the laste day of the same monthe of August deyde the most excellent, and most gra∣ciouse, and most doutyd prynce of Cristen chivalrye, Herry of Engelond the fyfthe, after the conquest the x^e, whos boones, in the begynnyng of Novembre folwynge, were brought into Engelond, and after to London; and on the vij day of No∣vembre he was ryally entered at Westm'.