A chronicle of London, from 1089 to 1483; written in the fifteenth century, and for the first time printed from mss. in the British museum: to which are added numerous contemporary illustrations, consisting of royal letters, poems, and other articles descriptive of public events, or of the manners and customs of the metropolis.

NOMI'A MAIOR' ET VICECOMITU' LONDON' TEMPORE REGIS HENR' T'CIJ, QUI CORONATUS FUIT APUD GLOUCESTR' IN DIE S'C'OR' SIMONIS ET JUDE ANNO D'NI MILL'MO CC^m xvj, ET ANNO ETATIS SUE NONO.

Jacob' Alderman maior p' p'te anni, et Sa∣lamon Basyng p' re∣siduo. Benet Seynturer, goldsmyth. Will's Blounitners.

A^o. p^o.

In this yere Walys was entirdited: also Eustache the Monk wyth manye Frensshemen as he was comynge into Engelond ward, for to helpe Lowys the kynges sone of Fraunce, was taken in the see be Hubert of Burgh and the V portes; and Eustache heed was smeten of, and the schippes drowned. And in this yere Lowys retorned home ayene with his meyne, and he hadde a m^l' mark of sylver.

Cerle, merc', maior. Thomas Bokerell. Rauf Guylond.

A^o s'c'do.

In this same yere the barons were take at Lincoln [[See note D.]] .

Id'm maior. John Vyell. John Spyc'.

A^o. t'cio.

This yere the kyng hadde of every plough land in Engelond [Translacio' s'c'i Thome archie'pi Cantuar'.] ij s. And in this yere seynt Thomas of Canterbury was trans∣lated the l yere after his martirdome.

Id'm maior. Ric' Wymbulden. John Vyell.

Anno iiij^to.

This yere the kyng was crowned ayeyn at Westminster, and Hubert of Burgh was mad the kynges chief justice.

Id'm maior. Ric' Reng'. John le Josne.

Anno v^to.

This yere of oure lord a m^lccxxiiij [[Sic in the Harl. MS. and, m^lij^cxxiij in the Cotton MS.]] , the emperour Baldewyn which whanne he wente to bataile to fyghte with Godes ene∣myes he hadde a croos boren before hym, whiche crosse seynt Eleyne made of the crosse that Cryst deyde upon; and there was an Englyssh prest that tyme with hym that was called S^r. Hughe, and he was borne in Norfolke, the whiche preest broughte the same crosse to Bromholm in Norfolke. Also in this yere the plees of the crowne were pletyd in the tour of London. [Plees of the crowne. Castell of Bedf' was stroid.] Also in this yere was the castell of Bedford beseged, whiche endured fro the ascencione of oure lord unto the assumpcion of oure lady; at whiche day be greet crafte and strong assaught it was wonne and distroid: and sithe it was not beldyd ayeyne because it was rebell to the kyng. Also in this yere began [Ordre of Frere Carmes began.] the ordre of Frere Carmes. Also in this yere upon seynt Lukes day there blew a gret wynd out of the north, whiche [A gret wynd.] caste doune manye houses, steples and torrettes of chirches, and turned up so downe trees in wodes and in orchardes, at [Firy dragons were seyne.] whiche tyme fyry dragons and wykkes spirytes grete noumbre were seyn openly fleyng in the eyre.

Id'm maior. Ric' Reng'. Th' Lambard.

Anno vi^to.

This yere a gret discencione aros in London be empechement of Walter Bokerell, so that Constantyne Fitz Arnulf the morwe aftere oure lady daye, the assumpcion, was drawe and hanged. And in this yere the kyng was purposed to have cast down the walles of London.

Ric' Reng', maior. Will's Joynour. Thomas Lamberd.

Anno vij^o.

In this yere, that is for to seye the yere of oure lord a m^lccxxiiij, [Frere Me∣no', ven' in Angl'.] in the feste of seynt Bertylmewe the apostell, the ordre of Frere Menours [[Prechours in the Cotton MS.]] cam ferst into Engelond. Also in this yere a man of Alderbery feyned hym Cryst, whiche was brought to Oxon', and there he was crucifyed.

Id'm maior. John Travers. Andrew Bokerell.

Anno viij^o.

The same yere were alle the alyens put out of the reaume. [Alyens put out of the ream.]

Id'm maior. Martin Fitz William. Rog'us Duke.

Anno ix^o.

In this yere the plees of the crowne were pletyd in the tour [Plees of the crowne.] of London; and John Harleon failed of his lawe for the deth of Lambard his liege.

Id'm maior. Roger Duke. Martin Fitz William.

Anno x^mo.

 

Rog'us Duke, maior. Steph'us Bokerell. Henr' Cobham.

Anno xj^mo.

This yere the schirrevehood of London and Midd' weren leten to ferme to the schirreves of London for ccc^li be yere, whiche was graunted the xviij day of Feverere in this sayd yere. Also the same day it was graunted be the kyng that alle the weres in [Weres in Tempse were stroid.] Thamyse schulde ben broken up and distroied, and never after schulde be set ayene. Also the xvj day of March in this yere the kyng graunted be his chartre to hise citezeyns of London, [The cite∣zeynes of London scholde paye noo toll on this syde the see, no be∣yonde the see.] that no toll schulde be taken of them in no kynges lond, as well on this syde the see as beyonde the see; and yf ony toll were taken of ony citezeyn of London, that thanne the schirreves of London schulde taken at London distresse of the folk of the contre, what tyme that they myghte be founden in London notwithstondynge. Also the xviij day of August suynge the kyng graunted to the maire of London waryne.

Id'm maior. Steph'us Bokerell. Henr' Cobham.

A^o. xij^o.

In this yere, the viij day of Juyn the libertes and the fraun∣chises of London were ratified; and also the kyng graunted that every schirreve of London schulde have too clerkes and too [Clerkes and seriaunts of the schir∣reve.] seriauntes and no mo for that office. Also the kyng graunted the same tyme to the citezeyns of London that they schulde have a comown seal, whiche schulde ben in kepynge of too [A comown seal.] aldermen and too commons of the citee: and the forsaid seal scholde nought be denyed nor warned to poure no riche of the same citee whanne thei hadde nede, yf there cause were reson∣able;

and that no mede schulde be take no payed of eny man in no manner wyse for the said seall.

Id'm maior. Walt' Wynchestre. Rob' Fitz John.

Anno xiij^mo.

 

Id'm maior. Ric' Fitz Walter. John Wobourne.

Anno xiiij^mo.

In this yere it was be the maire and be the aldermen, with the counseill and assent of alle the citee, and be othe sworne on the Evaungelies, that fro this tyme forth there schull never schirreves of London abyde leng' in that office thanne on yere. And in this yere the same Roger was discharged of the office of the meiralte.

Andrew Bokerell, m'. Mich' of Seynt Eleynes. Walt' Senford.

A^o. xv^o.

In this yere aroos a gret discord betwen the kyng and Hubert of Burgh; which Hubert fledde to the chapell of Brendewode, and there he was taken and thanne imprisoned in the tour of London, and after he was exiled. Also this yere was a gret harm done in the citee of London for the fyere of dame Jonet Lumbarde.

Id'm maior. Herry Edelmetone. Gerard Batte.

Anno xvj^o.

 

Id'm maior. Simon Fitz Marie. Rog' Blounte.

Anno xvij^mo

In this yere S^r. Edmond was sacred erchebysshop of Caun∣terbury,

whiche now is called seynt Edmond of Pounteney, whiche Edmonde dede afterwarde revoke Hubert of Burgh, that com ayene into Engelond and submitted hym to the kynges grace. This yere, in the iiij idus of Feverer', was a gret wynd, a gret erthequake, and a gret thondyr. Eodem anno idem rex accepit ab om'ib' reb' mobilib' le quarantisme p' totam Angl' [Quarantisme parte.] in adjutor'm sibi in suis bellis.

Andrew Bokerell, m'. Ric' Assheby. John Norman.

A^o. xviij^o.

 

Id'm maior. Gerard Batte. Robert Hardell.

Anno xix^o.

In this yere, the morwe after seynt Hiller day Edmond the erchebisshop of Caunterbury spoused the kyng and dame [Henr' accep' in uxore' filiam count' P'vincie.] Elianore the erles doughter of Provynce togidere at Caunter∣bury; and on the viij day of seynt Hillar sche was crowned at Westminster, and thanne the statut of Mertone was mad. [Statutu' Merton.]

Andrew Bokerell, m'. Herry Cobham. Jordan Coventre.

A^o. xx^mo.

 

Id'm maior. John Colsan. Gerveys Cordewan'.

A^o. xxj^mo.

 

Ric' Reng', maior. Joh'nes Wyghale. Joh'n Saundres.

A^o. xxij^mo.

This yere on seynt Botolf even was borne Edward the kynges

sone. It'm in cest an prist le roy en son eide le xxx^me des mo∣ebles [Trantesime parte.] p' tout la terre.

William Joynour, m'. Renerus Bungey. Rauf Asshewy.

A^o. xxiij^o.

Eod'm anno d'n's Simon Mountfort desponsavit Alianoram so∣rorem d'm reg' H. et comitissam Pembr'. Et anno sequ' fecit d'c'm d'n'm comitem Leyc'. Et eodem anno, i. e. anno iiij^to natus fuit filius eius Edwardus, int' ip'm et Alianoram reginam, [Edwardus long' femo∣rib'.] qui postea vocab' Edwardus longis femorib'.

Gerard Bate, m' John Gysors. Michael Tony.

A^o. xxiiij^to.

In this yere seynt Poules chirche was halowed. [Seynt Poules was halwed.]

Renerus Bungey, m'. John Vyell. Thomas Durh'm.

A^o. xxv^to.

This yere deide Rog' bysshop of London: and William of the [Obiit Rog'us ep'us Lon∣don'.] Marche was drawen and hangyd.

Id'm maior. John Fitz John. Rauf Asshewy.

Anno xxvj^to.

In this yere seyled the kyng on the see ryally to Burdeux.

Rauf Asshewy, m'. Hugo Blount. Adam Basynges.

A^o. xxvij^o

This yere the kyng com into Engelond fro Bordeux; and the [The plees of the crowne. The kyng did cu' frome Burdeux.] plees of the crowne were pletyd in the tour of London before

William of York, Richard Paschelewe, Herry Braha and Je∣rome of Saxton, justices. Also werre began betwen the kyng and Thlewelyn prince of Walys; also Griffith Thlewelyn sone fel out of the tour of London and brak his nekke.

Mich' Tony, m'. Ric' Spyc' Nich's Batte.

A^o. xxviij^o.

 

John Gisors, m' p' maiore p'te ann'. John Cornehull. David Benteley.

A^o. xxix^o.

This yere Mich' Tony meire of London, and Nicholl Batte schirreve, were convicte before the kyng of periuracion be the othe of alle the aldermen, for as muche as Nicholl Batte lefte schirreve over his yere; wherefore Michael Tony was deposed fro the meiralte and Nich' Batte fro the schirevehod, and an∣other chosen as it is aforeseid.

Idem maior. Simon Fitz Marie. Laurens Frowyk.

A^o. xxx^mo.

Eod'm anno idem rex renovavit eccl'iam Westm' ult' med'm [Renovacio Westm'.] p' unam archam. And this same yere was seynt Edmond of Pounteney translatyd [See note B.]] .

Petrus Fitz Aleyn, m'. John Vyell. Nicholl Batte.

Anno xxxj^mo.

Eod'm anno s'c'us Edmundus fuit canonizatus eciam frat' reg' H. et comes Cornub' incep^t fundamentu' monast'ij de [Mon' de Hayles.] Hayles [See note C.]] .

Mich' Tony, m'. Nicholl Jocie. Geffrey Wynchestr'.

A^o. xxxij^do.

 

Rog' Fitz Rog', m'. Rauf Hardell. John Tholosan.

A^o. xxxiij^clo.

 

John Norman, m'. Humfrey Bras faber. Will'm Fitz Richard.

Anno xxxiiij^to.

In this yere, the Thorsday before the feste of Simond and Jude was a gret wynd and an horrible tempest whiche dede muche harme thorugh all Engelond; and Lodowyke the kyng of Fraunce tok Damaske the iiij kal. of Juyne.

Adam Basynges, m'. Laur' Frowyk. Will's Fitz Richard.

A^o. xxxv^to.

In this yere of oure lord a m^lccl began the ordre of frere [Ordre of frere Aus∣tyns began.] Austyns; also in this yere the kyng wente into scotland to marie his doughter to Alisaundre the kyng of Scottes.

John Tholosan, m'. Will'm Durham. Thomas Wyborne.

A^o. xxxvj^to.

This yere the kyng graunted be his chartre on the xij daye of Juyne, that the schirreves of London schulde yerly ben allowed in the Eschequier for there office of the schirrevehood vij^li [vij^li is al∣lowed for the office of the schirrefs of London.] . Also that after the meire be chosene he schulde be presented to the barons of the Escheker. And in this yere the kyng schipped at Portesmouth toward Burdeux.

Nicholl Batte, m'. John Northampton. Richard Pychard.

A^o. xxxvij^o.

This yere the quene, and Edward here sone, and Boneface the erchebysshop of Caunterbury sailed over the see toward Burdeux. Also this yere, the day of S^t. Paulyne the bysshop, fell manye mervailes be the watres of the see, as full grete hete and droughte.

Ric' Hardell, m'. Rob^t. Lyntone, drap'. Will'm Asshwy, merc'.

A^o. xxxviij^o.

In this yere Edward the kynges sone spoused the kynges suster of Spayne. Also in this yere the kyng com from Bur∣deux thorugh Fraunce, and arryved at Dovore on Cristemasse day; and on seynt John day he com to London, and enpri∣soned the schirreves in the tour of London a monyth and more, for on John Frome that was undyr there warde whiche escapyd out of Newegate, the whiche John was taken in warde for the deth of a priour that was the kynges alye; and new schirrefs mad, as it folowith.

Id'm maior. Stephan Distergate [[Oyster∣gate in the Cotton MS.]] . Herry Walmode.

A^o. xxxix^o.

 

Id'm maior. Matheu Bokerell. John le Mynour.

Anno xl^o.

This yere deyde Robert Grostede bysshop of Lyncoln, in the [Obiit R. Grosted ep'us Lin∣coln'.] vij idus of Octobre. And in this yere, the Soneday before the translacion of seynt Edward, the wyf of S^r. Edward the kynges

sone com into Engelond and to London; and S^r. Edward com hymself on seynt Andrew evene to London. And in this [The cruci∣fienge of a child.] yere a litell child called Hughe of Lincoln was taken of Jewes and crucified.

Id'm maior. Ric'us Ewell. Will'm Asshby.

Anno xlj^o.

Eodem anno fuit Ric'us comes Cornub' et frat' reg' H. coronatus in regem Almiaine.

Id'm maior. Th' Fitz Richard. Rob^t. Catelongre.

Anno xlij^do.

In this yere Ric'us erle of Cornub' was chosen emperor; and [Ric' comes Cornubie elect' est imp'ator.] Thlewellyn prynce of Walys held werre ayens the kyng. Also this yere, abougte the convercion of seynt Poule, tydynges comen to the kyng that the cite of London was nought trewly, no in [A gret com∣pleynt made to the kyng of the citee of London.] due maner gowerned: wherupon was mad an inquisicion be xxvj men of every warde; and John Mauncell, examyned be the kynges counseill, tolde the tale for alle the companye, and seyde that Richard Hardell mair, Robert Catelongre schir∣reve, John Tholesone, Nich' Batte, Nich' Fitz Jocy, Mathew Bokerell, John le Meynoure, Arnold Tednore, and Herry Walmode, aldermen, were worthy to be prevyd of there offices, and never after to bere stat in the citee. Also in this [The parle∣ment at Oxon.] yere after Trynyte Sonedaye was the parlement at Oxenford, where aroos a gret discord betweye the barons on the too partye, and Audymere eslyte of Wynchestre, William Valence, Geffrey of Wynchestre, and the kynges brethren, on the other

partie, for divers trespaces and transgressions; wherefore the kynges brethren were somond to come to the parlement at Wynchestre; and whanne the parlement was begonne, the forsaid kynges brethren wolde nought obeye to the lawe; wherfore two of them weren exiled, whiche passed the see at Dovorre.

John Gysors, m'. John Adryan. Rob' Cornhill.

A^o. xliij^cio.

This yere scutage was gadered in Engelond of every knyghtes [Scutagium.] fee xl s. The same yere, the morwe after Al Sowlen day, Ric' of Gravesende at Caunterbury was sacred bysshop of Lincoln be Bonoface erchebysshop of Caunterbury. And in this yere, that is to seye the yere of our lord a m^lcclviij, there fel a Jewe into a pryve at Teukesbury upon a Satirday, the whiche [Jewe.] wolde nought suffre hym selfe to be drawe out of the preve that day for reverence of his Sabot day: and S^r. Richard of Clare, thanne erle of Gloucestre, herynge therof, wolde nought suffre hym to be drawe out on the morwe after, that is to say the Soneday, for reverence of his holy day; and so the Jewe deyde in the preve. Also in this yere was a gret derthe of [A quart' of whete at xxiiij s.] corn, for a quarter of whete was worth xxiiij s. And in this yere Richard the erle of Cornewaille was crowned emperour of Almayne.

Will'm Fitz Richard, m'. Adam Brounyng. Ric' Coventre.

A^o. xliiij^to.

In this yere, abougte Alhalwen tyme, the kyng with the quene,

with other barons and lordes, seyled over the see to the kyng of Fraunce, and dwelled there half yere and more with gret honoure and love, so that he hadde no wil homward; but he was thretned be the co'e counsaill of Engelond that but if he come home here sounne they wolde chesyn them a newe kyng: and there was gret discord, and a rysynge betwen Edward the kynges sone and Richard thanne erle of Worcestre [[Gloucestre in the Cotton MS.]] , so that all Engelond was meved to werre; for whiche, a lytel before Whitsonday the kyng come into Engelond, an cam into London, and lay in the bysshopes palys of London besyde Poules, unto the tyme that pees was stablisched thorough alle Engelond.

Id'm maior. John Northt'. Ric' Pychard.

A^o. xlv^to.

 

John Tallour. Ric' Walbrooke.

A^o. xlvj^to [[See note C.]]

This same yere, abought the fest of the traunslacion of seynt [Note:—That no record makes mention of an earle of Worcester in this time.] Thomas, the kyng with the quene sailled over the see into Fraunce, and the erle of Worcestre [[Gloucestre in the Cotton MS.]] deyde.

Th' Fitz Thomas, m'. Philip Walbrok. Ric' Taillour.

A^o. xlvij^mo.

In this yere began the barons werres, in whiche there were [The barons werres.] many ful worthy lordes sclayn, and moche myschief and sorwe was that time in Engelond.

Id'm maior. Robert Mounpylers. Osbert Vynt'.

A^o. xlviij^o.

In this yere the town of Northampton was taken, and manye of the men that were founden withinne were sclayn, forasmoche as thei hadde ordeyned wyldefeer for to abrent the citee of London. Also this yere, after the purificacion of oure lady, the kynges litell halle at Westm' with the chaumbre were brent. Also in this yere, at Whitsontyde, there aroos a grete discord betwen the kyng and his barons, and the bysshop of Hereford was taken and lad into Walys into a castell. Also in that dis∣cord Elianore the quene was foule repreved and almost sclayn upon London bregge: and after this, a litel before Mighelmesse, the kyng and the quene sailed into Fraunce, to the kynges par∣lement of Fraunce.

Id'm maior. Th' de la Ford. Gregor' Rokesley.

A^o. xlix^o.

This yere the kyng com fro Fraunce and held his parlement at Redyng, fro which parlement the kyng and the lordes de∣parted [A parlement at Redyng.] in wrathe; and the kyng wente ayene to the parlement into Fraunce: and after this, for werre and defaute, the stretes of London were cheyned. And abought the purification of oure lady the kyng com home fro Fraunce; and the barons token the [Barons werre.] town of Northt' the Satirday nest before Passion Sonday; and the Wednesday nest folwynge there were manye Jewes sclayn and distroyd. And in the morwe of seynt Pancras, in the monthe of May, was the bataile of Lewes, betwen the kyng and the [Bellum de Lewes.]

barons of the reaume, in whiche bataile manye men were sclayn on both parties: and in this bataile the kyng was taken and S^r. Edward his sone, and Richard erle of Cornewayle and manye othere were lad into diverses castelles. And in the same yere appered stella comata whiche endured xv dayes. [Stella co∣mata.]

Id'm maior. Edwardus Blount. Petrus Aunger.

A^o. l^mo.

In this yere Edwarde the kynges sone brak oute of warde of Sire Simond Mountford erle of Leycestre and of Hereford, and he wente to the barons of the March, and they reyceyved hym withe moche honour. And on the Satirday in the myddes of August he scomfited Simon of Mountford at Kelyngworth. And on the Wednesday nest after was the batall of Evesham; and [Bellu' de Evesham.] there was sclayn Simond of Mountford erle of Leycestre, the lord Spenser, S^r. Rauff Bassett, S^r. Thomas Asteley, William Maundevyle, S^r. John Beauchamp, S^r. Guy Bailliof, S^r. Roger Roule, &c. and the barouns discomfited [[See note D.]] .

William Fitz Ric', custos. John Lynde. John Walravyn.

A^o. lj^o.

In this yere S^r. John Savylle was taken with strong hond at Cesterfeld; atte whiche tyme the lord Ferrers fledde, and be a woman was betrayed in the chirche, and so taken. And Octobon the popes legat held a counseill at Northt', where he accursed alle thoo that stoden with the erle of Leycestre Simond, or hym helpith or favoureth.

Aleyn South, custos. John Adryan. Lucas Batencourt.

A^o. lij^do.

This yere, that is to seye the yere of oure lord a m^lcclxvij, began the empire of Tartaryn, the whiche emperour is called the grete Cane; and he is now holden grettest and most [The greate Caem.] myghty lord of alle the world. In this yere the kyng held his parlement at Marleburgh, in the octaves of seynt Martyn, where, be the assent of alle the nobles and choson comoners of Engelond, were mad the statuts called the Statuts of Marleburgh.

Id'm custos. Walter Hervy. Wiliam Duremsone.

A^o. liij^o.

This yere Octobouns the popes legat held his counseyll at seynt Poules in London.

Hugo Fitz Thom's, custos. Th' Basyng. Rob't Cornhill.

A^o. liiij^to.

This yere the kyng lete translate ayeyne the body of seynt [T'us s'c'i Edward'.] Edward into a precious schryne; and there weren alle the lordes spirutuelx and temporelx of Engelond. And in the xvj day of March the kyng ordeyned that no man schulde gon ought of the citee of London be water no be londe to regrate ony vitaile. Also in this yere after Estren the kyng graunted [Hoc A^o. con∣cessit civib' Londo'.] to the citezens of London alle there liberties and fraunchises. And on the morwe of seynt Lucye the virgyne was gret erthe∣quake aboughte evesong tyme. [T're mot'.]

John Adryan, m'. Walter Potter. John Taillour.

A^o. lv^to.

In this yere Edwarde the kynges sone, in the feste of Philip and Jacob, tok his vyage into the holy lond with manye othere grete lordes bothe of Engelond and of other londes.

Id'm maior. Gregorius Rokesley. Herry Waleys.

A^o. lvj^to.

In this yere, the V kal. of Feverer', the yere of oure lord a m^lcclxx, the stepil of the chirch of seynt Marie at the Bowe [Bowe stepil fil doun.] fel down in Chepe, and perysshed moche peple. And in this yere Edwarde the kynges sone was wounded of a Saresyn at [The Sowdon sente l'res to Edward the kynges sone be a Sarasyn, whiche wolde a sclayn the said Edward, whiche Ed∣ward stran∣gled the Sarasyn.] Acres, whiche broughte hym lettres fro the Sowdone, the whiche Sowdone menynge tresone hadde sent the same Sarasyn with the lettres unto the said kynges sone Edward, whiche for hete of the contrey eyre satt on a bedde in his doublet, and opened them. Whiles the lettres weren in redynge, the said Sarasyn, knelynge befor hym, drowe out a knyf yvenymed, and wolde have smyten the sayd S^r. Edward in the bely, and failed; but he smot hym in the arm and eft ayeyne in the foot: whiche Sa∣resyn he stranglyd betwen his too handes to the deth; and sithens he was cured therof, blessyd be God. Also in this yere the said S^r. Edward comynge hom thorough Fraunce, he dede the tor∣nement at Chalons, whiche was proposed for his distruccion for envye.

Sire Wat' Hervy Miles, m'. Robert Milborne. Petir Cosyn.

A^o. lvij^o.

These two scherreves were convict before the barons of the

Escheker, in the fest of seynt Andrew; forasmoche as they token [The schir∣reves were deposyd for takynge mede of the bakers.] mede of the bakers of London, and wolde nought leten them be corrected and justified: wherefore they were deposyd of there offices; and in there stedes were seet John Bedle and Richard Parys. And in this yere, on seynt Edmondes day the bisshope, in the yere of oure lorde a m^lcclxxij, kyng Herry the thridde deyde, and rially was beryed at Westm'.