The University of Michigan Library provides access to these materials for educational and research purposes. These materials are in the public domain. If you have questions about the collection, please contact [email protected]. If you have concerns about the inclusion of an item in this collection, please contact [email protected] .
DPLA Rights Statement: No Copyright - United States
In this yere kyng John loste all Normandye and Angoye be werre; and he toke of every plowe lond in Engelond iiis. toward hise werres.
This yere the kyng held his parlement at Londone, and asked [Parlement at Londoun.] of the clergye the stynte of every chirche in Engelond for to conquere ayen Normandye and Angoye. And in this yere deyde Huberd erchebisshop of Caunterbury; and thanne the priour and the covent of Caunterbury chosen in there chapytre hous the noble clerk Stephen of Langeton, ayens the kynges will, whome the pope sacred at Viterke. And this yere deide [S'cus Hugo de Lincoln isto anno monebat'.] seynt Hughe of Lincoln; also the erchebysshopp of Caunter∣bury; and the priour of Cricherche, and all the monkes weren exiled.
This same yere, be the avyse of wyse men of the citee of London that were chosene xxxv men whiche were sworne to holde and mayntene with the maire the assyses.
In this yere of oure lord a ml'ccij, there fallen grete reynes, [Hailstones grete:] and hailstones as gret as an ey medlyd with reyn, where thorugh trees, vines, cornes, al manner frutes were moche distroied; and the peple were sore abaysshed, for there were seyn foules fleynge [and foules were seyn berynge fyer in the eyr in there billes.] in the eyre berynge in there billes brennyng coles, whiche brenden manye houses. And in this yere Engelond and Walys were enterdited, and stood so vj yere and more, for the kynges trespas.
In this yere of oure lord a ml'cciij a quarter of whete was [A quart' of whete at xxv s.] worth xxv s., and a cistern of wyn was worth iiij s.
In this yere were seyn at oones too fulle mones in the fir∣mament. [In this yere were too mones seyn. Frere P'chours ordre began. A gret wynt' and long durynge.] And in this yere of oure lord a ml'cciiij began the ordre of Frere P'chours, in the cuntre of Tholomeis, undir duke Domynyk. Also in this yere was a strong wynter and an hard, fro the circumcisione of oure lord til the annunciation of oure lady.
This same yere the plees of the coroune were pleted in the [The plees of the crowne were pletyd in the tour.] tour of London, and Hugh of Cisell was drawe and hanged.
This yere the enterdytynge of the reaume was new proclamed thorugh out Engelond. Also in this yere was born Herry the kynges sone; and in this yere the kyng wan Irlond.
In this yere was the firste maire of London; and seynt Marie [P'm's maior. Sent Mary Overy was begonne.] Overeye was that yere begonne.
In this same yere the land was reconsyled, and the enter∣dytyng [The cessyng of the enter∣dytyng of this land. London brigge was first begonne to make.] cesed: and in this yere the stone brigge of Londone was first begonne to make.
In this yere an eretyk was brent for eresye, the whiche be craft quenchyd ofte the fire.
In this yere was gret discencione be twen the kyng and hise lordes; and Lowys the kynges son of Fraunce was waget to come into Engelond with manye Frensshmen, whiche dede moche harme in the reaume or they wenten home; and the kyng wente with his hoost to Berham Downe. And in this [A gret parte of London was brent.] yere, on seyn Benettes day, Southwerk, Londone brigge, and the moost part of London was brent.
In this yere was Castell Baynard cast done and distroied.
In this yere, on candelmasse even, the kyng seyled unto Peytowe.
In this yere, that is to seye the yere of oure lord a ml'ccxiiij, [The ordre of Frere Me∣nors began.] began the ordre of seynt Fraunceys, besyde the assise of Frere Menours. And in this yere, in the fest of Gordiam in Sep∣tembre, the barons entred the citee of Londone, and strong werre was betwen the kyng and the lordes: and Rog' Fitz Aleyn, maire, was discharged of his meiralte be the forsaid barons, and afterward they chosen Cerle meire, and the schir∣reves as it folwith: and yet lasted the werres.
This yere, on seynt Lukes day, the kyng deyde and was beried at Westm'.