¶ The xxxiij chapyter conteyneth how Blanchardyn made pyteouse complayntes for his lady wythin a gardyne, [Wanting in the French.] and of the grete recomforte that was made to hym of sadoyne / [En promettant que de tout son pouoir lui aideroit]
Ye haue all ynoughe vnderstande here a fore how blanchardyn had the goode grace of the kynge of prusse, of Sadoyne his sone, & the loue of all the barons of the sayde royalme. And how he had reffused the kynges cosyne for to haue her in maryage; but the grete loue & fydelyte that he had toward his lady, the proude pucelle in amours, kept hym there fro / for rather he wold haue deyed than to haue falsed his feyth ayenst her, for whome he had at herte so many a sorowful & hevy thought for to bere / for nother nyght nor daye he dyde non other thinge, but thynke how & what manere he myght departe out of the contrey where he was Inne, for to go to gyue socoure vnto the proude pucell [sign. G iiij.] in amours his fayre loue, that was his souerayn desyre & his right besy & contynually thoughte, wherof it happed upon a daye amonge other as blanchardyn was entred in a gardyne wythin þe kynges paleys alone, wythout eny feliship, for to complayne the better his hertes sorowes, that in beholdyng vpon the fayre flouris wherof nature had fayre appareylled the gardyne, & amonge other he sawe a rosier tree laden with many a fayr rose that had a smel ful swete / emonge whiche one was ther that of flagraunt odoure & of beaulte passed all the other; wherfore vpon her he dyde arrest