Page 72
¶ The xxij. chapitre conteyneth and speketh of the deuyses that were betwene the prouost and the proude pucelle in amours. And of the grete loue that she had sette to blanchardyn the yonge knyght, as it folowed here / [Wanting in the French.]
The proude pucel in loue, heryng þe prouost, was right glad, for she herkened not to þe rewthes, but onely to that loenge and praysynge of her louer and frende specyall. But well she bethought her self that the doughters of the prouost sholde not longe trouble her heedes, for she sholde purueye therto of a remedy conuenable. And whan she spake ageyne, her wordes were suche. 'Prouost, as byfore I haue sayde vnto you, the knyght of whom I speke, parauenture is of byrth right hyghe; And suche and so vertuouyse in armes, as ye knowe. It nedeth not to be doubted that he is comme to his extremyte of prowes and valyantnes, wythout that amours hathe be the cause in the persone of some hyghe a pryncesse. And for to telle you I knowe well soo moche, that he is this day in the goode fauoure and grace of a kynges doughter, right ryche, myghty, and well in lynage, & endowed as men sayen of all that / that can be desyred in the body of a woman. And therfore grete foly it is to youre doughters to haue suche an ouerwenyng [oultrecuidant] wylle, wherof men gyuen them a dysmesured proclame / Neuertheles, as dere as ye haue my playsure to fulfylle / and aboue all to renne in to myn indygnacion, holde the hande to this, that they forbere hem self to the smylynges and fayre shewes of their eyen, whiche wauntonly they caste full often vpon that yonge knyght. [that they forbere hem self to the smylynges and fayre shewes of their eyen, whiche wauntonly they caste full often vpon that yonge knyght = que elles se deportent de semblant et regars quelles font vers le cheualier.] And to thende