ÞE ZEUENDE BOȜ OF MILDENESSE.
Of þise aquayntonce and of þise priuit� þe ilke holy zaule be-ginþ to habbe of god be-tuene hire / and an holy prede. Vor huanne hi is y-reaued / þanne to heuene / hi lokeþ ope þe erþe uram uer / ase zayþ ysaye / and hise yzyȝþ zuo lite to þe ziȝþe of þe gratnesse of þe heuene. zuo y-zicþ þe ilke greate uayrhede / zuo dim / to þe ziȝþe of þe grate briȝtnesse / zuo emti. to þe ziȝþe of þo greate blisse: þanne onworþeþ and misprayseþ to þe zoþe al þet he heþ ine þe wordle of richesses and of worþssipe / of uayrhede / of noblesse. zuo moche him þinngþ þet hit is ase þe play of children amidde þe strete / huer y-noȝ hi trauayleþ and naȝt ne wynneþ. Him hit þingþ þet hit is al wynd / and metinge / and lyeȝynge / ase zayþ salomon. And þanne he be-ginþ ariȝt to sterue to þe wordle / and libbe ine god / ase zayþ zaynte paul. And þanne is hi zuo poure of gost : þet hi ne heþ naȝt. Vor god him heþ zuo his oȝene gost y-reaued and be-nome. and ayen y-ueld of his oȝene / ase he dede þe apostles at lokes. Þanne him yefþ þe holy gost ane zuo greate herte : þet ne prosperit� / ne aduerset� of þe wordle hi ne prazeþ ane nhote. Ane zuo greate zikernesse of inwyt : þet hardiliche abit þane dyaþ. ane zuo greate hope heþ ine god: þet þer ne is naȝt / þet hi ne dorste nime anhand uor þe loue of god. Vor hi heþ þo byleue huer-of god spekþ ine þe godspelle. þet is ase þet zed of mostard huerby hi may hote to þe stones an to þe helles / and hi him bouȝeþ. Þet zed o mostard is wel smal / ac hit is wel strang / and wel bitinde. uor hit is hot ine þe uerþe degre / ase ziggeþ þise fisiciens. be hete: me onderstant /