The University of Michigan Library provides access to these materials for educational and research purposes. These materials are in the public domain. If you have questions about the collection, please contact [email protected]. If you have concerns about the inclusion of an item in this collection, please contact [email protected].
DPLA Rights Statement: No Copyright - United States
Þe greate maister of mildenesse Iesu crist þo he hedde y-preched / and y-ued þet uolk / and þe zike / and þe ymamed y-held. þo he uleaȝ aboue þe uolk in-to þe helle / uor to by ine bedes / ous uor to teche to beuly þet los and þe blondingges. and þeruore þe trewe herte milde / ase him pineþ to done wel huanne he bouȝþ. alsuo him paineþ to be-uly los / of him-zelue ansuerie uor þane wynd of ydele blisse / and þet
gadereþ uor þe rage / and uor þe tempeste of euele tongen / ine þe ssede of þe roche. ase zayþ ysaye. Þe ilke roche is Iesu crist him-zelf. þet his reste / and briȝtnesse to þe milde. þer him resteþ þe irchouon. ase zayþ þe sauter. þet by þe milde herten y-carked mid þornes of ssarpnesse of penonce. An þet is þet coluerhous / huerinne resteþ and him deþ þe colure oure lhord. Þet byeþ þe milde herten and simple uor þe uoȝeles of praye. þet byeþ þe dyeulen. Huanne þe milde herte / heþ zuo moche y-do / þet he is y-guo in-to þe hole of þo roche ase þe colure ine his coluerhous. þet is huanne he recordeþ þet lif of iesu crist / and his holy passioun : uor þanne he uoryet alle his zorȝes / and prayseþ lite al þet þe wordle heþ. and is worþ. and may. Herte þet þis heþ a-sayd / naȝt ne willieþ more / þanne uor to by uorlore / and uoryete to þe wordle. Þe wordle is him prisoun. onhede / paradis. Vor ase zayþ þe wyse of him-zelue. þet he ne is neuremo lesse allone / bote huanne he is one. ne more ine niedes : bote huanne he is ydel. Vor he ys þanne mid his tuaye beste uriendes. þet is mid him-zelue / and mid god. Þer treteþ he of his greate quereles hueruore alle oþre niedes him þingþ trufles. þer he him to god / and god to him / be holy þoȝtes / and be stedeuest wil. Þer he uelþ [An s has been cancelled before u.] þe greate zuetnesse of confort / þet god yefþ ine priué stedes / to þan þet him dredeþ. ase zayþ þe sauter. and þanne alle speches / and alle wordes him tyeneþ / and greueþ / bote yef hi ne by to god / oþer of god / oþer uor god. Þous bi-ginþ þe zaule to louie onhede / and stillehede. and þanne him wext ine herte ane holy ssamnesse / þet is one of þe uariste doþter [So in MS.] of mildenesse. Vor al ase a mayde þet be greate loue loueþ / heþ [So in MS.] grat ssame heþ [So in MS.] þanne hi is aspid / and y-herþ þet me spekþ : of hire. alzuo heþ þe ilke huanne hi y-hyerþ þet me spekþ of hire : and of þe guodes þet god him heþ y-do. And naȝt uor þan hi deþ ase deþ
þe ilke mayde strongliche opnome of loue. [MS. has lone.] uor huet þet [typographic Fol. 44. a.] þe wordle zigge / oþer conne speke : alneway zecþ hi þe halkes and þe derne stedes. ase þe ilke þet ne zecþ bote uor to by y-rauissed ase wes saynte paul.