Dan Michel's Ayenbite of Inwyt : or, Remorse of conscience : Richard Morris's transcription now newly collated with the unique manuscript British Museum MS. Arundel 57, volume 1, text / by Pamela Gradon.

OF BOȜSAMNESSE.

Þe ournemens of boȝsamnesse : byeþ zeuen. Þet ys : þet me bouȝe prestliche. gledliche. simpleliche. klenliche. generalliche. zuyftliche. and wiluolliche. Þe milde y-zyȝþ beuore [bo-uore in MS.] his eȝen: þet he ys poure and naked. and ne heþ niede bote uor him-zelue. and þeruore he is alneway agrayþed / ase byeþ þe ssipmen ine ssipe. þet ase zone ase he [hi?] y-hyerþ þane smite of þe lodes-manne : hi yerneþ / hi lheapeþ ase wode. Þe milde bouȝþ gledliche / uor he is ase þe hassasis. þet ys bliþe huanne he heþ þe heste onderuonge of his maistre. þet þe perils / and þe pinen / an þane dyaþ he onderuangþ þerwyþ/ mid to greate blisse uor þe loue þet he heþ to þe obedience. Þeruore zayde dauiþ ine þe sautere. þet he louede betere þe hestes þet god him made : þanne he dede / gold / oþer stones of pris. Þe milde him bouȝþ al simpleliche ase deþ þet hors / oþer þet ssep / þet þe ssepherde let huer ha wyle / þet ne zayþ neure hueruore guo ich hider : more þanne þider. Vor one of þe guode doȝtren þet mildenesse heþ : is holy simplesse.

Þe milde is wel trewe to god / ase is a guod lheuedi to hire lhorde. þet nele to nonen queme folliche bote to hare lhorde onlepiliche. and þeruore non ne bouȝþ zuo clienliche [MS. chenliche] / ne mid zuo clene onderstondinge: ase deþ þe zoþe milde. þet ne hateþ bote uor to kueme þe wordle. Efterward þe milde is wel zuift and wel ingnel / huanne uirtue of obedience and þe wyl of god / mid his ouerling him berþ. Ac huanne his oȝene wyl him berþ and let him. he is slac an sleuuol wel to done. Ase is þe sterre þet hatte saturne makeþ þet asemoche yernþ in onelepi daye mid þe firmament ase þe firmament hine let : ase he deþ ine þritti yer ine his oȝene sercle / and ine his oȝene yerninge. Ate laste þe milde bouȝþ generalliche oueral þer he ylefþ þet he queme to god / and ine alle þinges ase deþ þe asse of þe melle. þet ase bleþeliche berþ bere : ase huete. and lyad. ase þet corn. to þe poure : ase to þe riche. Efterward þe milde is wel strang. uor he chongeþ his strengþe mid godes [typographic Fol. 43. b.] strengþe. ase zayþ ysaye þe profete. þeruore nis he naȝt: þet ne may bere. Vor god berþ and him and his berdone / hueruore he boȝþ wiþ guode wille and bleuindeliche. uor he ne is neuremo weri / ne þe zonne þet god let / and brengþ uorþ. and þe more ha leueþ / þe more him wext his strengþe. alsuo ase þe litel amote. Nou miȝt þou wel y-zy / hou mildenesse þe tekþ wel to serui / and parfitliche bouȝe.