STRENGÞE.
Þe uirtue of strengþe / heþ alsuo þri offices. Vor huo þet þise uirtue heþ : he him a-rereþ an heȝ a-boue þe perils þet byeþ ine þe wordle. No þing him ne dret / bote vileynie.
Aduerseté / and prosperité / he berþ / and þoleþ wyþ-oute wepinge. ne ariȝthalf ne alefthalf. Wel ssolde he by guod knyȝt / þet ine þise þri þinges were wel y-proued. Þise þri uirtues armenþ / an ordayneþ. and agrayþeþ man / ase to þri deles of þe herte / þet me cliepeþ [MS. chepeþ] scele. loue. and strengþe. Prudence / lokeþ þane scele [MS. sclele] / þet hi ne bi becaȝt. Temperance / lokeþ þane loue / þet hi ne by amerd. Strengþe. lokeþ þet wyl: þet hi ne by ouercome.