Dan Michel's Ayenbite of Inwyt : or, Remorse of conscience : Richard Morris's transcription now newly collated with the unique manuscript British Museum MS. Arundel 57, volume 1, text / by Pamela Gradon.

OF ÞE UOUR UIRTUES CARDINALES.

Of þe uour uirtues cardinales spekeþ moche þe yealde philosofes. Ac þe holi gost hise yefþ / and tekþ / betere an hondredsiþe. ase zayþ salomon ine þe boc of wysdome. Of þise uour uirtues þe uerste me clepeþ / sleȝþe —. þe oþer temperance. þe þridde / strengþe. þe uerþe / dom riȝtuolnesse. Þise uour uirtues byeþ y-cleped cardinals. uor þet hi byeþ heȝest amang þe uirtues / huer-of þe yealde filosofes speke. Vor be þise uour uirtues þe man gouerneþ him-zelue ine þise wordle. ase þe apostles gouerneþ holy cherche be his cardinals. Sleȝþe: lokeþ þane man þet he ne by be none sleȝþe of þe kueade y-gyled. Temperance. þet he ne by be none kuede loue amerd. Strengþe. þet he ne by be tyene. oþer be drede. oþer be zorȝe : ouercome. þise þri hyeldeþ man ine guod stat auorye him-zelue. Dom. hine zet ine ordre and ine riȝt stat a-yens oþre. Vor hi yelt to echen al þet his is. Þise byeþ þe uour tours ine þe uour cornyeres of þe house of þe guode manne / þet makeþ þet hous ziker and strang. Sleȝþe: hit wereþ wyþ þet yeast be porueynge aye þe perils. Temperance / aye þet zouþ. aye þe wykkede hetes. Strengþ. aye þet norþ. aye þe wyckede cheles. Iustice. aye þe west. a-ye þe wyckede raynes.