Dan Michel's Ayenbite of Inwyt : or, Remorse of conscience : Richard Morris's transcription now newly collated with the unique manuscript British Museum MS. Arundel 57, volume 1, text / by Pamela Gradon.

HUERUORE HI BYEÞ Y-CLEPED YEFÞES.

Þise graces byeþ yhote yefþes uor þri skeles. Verst uor hare dingneté and hare worþ. yef me yefþ ine þe kinges cort ane robe to ane childe / oþer ane poure

manne: ane dissuol of pesen / þet ne is no þing þet by worþi to by ycleped yefþe of kyng. Þeruore saynt iacob clepeþ alle þe oþre guodes þet god yefþ / and timliche / and gostliche. nauȝt yefþes : ac y-yeue. þet by chonginde / and guoinde. Ac þise graces he clepeþ yefþes uolueld. Vor he his ne yefþ to nonen: þet he ne yefþ him-zelue. Þe oþer scele is / uor þet þe oþre graces / and þe oþre guodes he ous lenþ uor to usy ine þise liue. Ac þise byeþ yefþes ariȝt wyþ-oute wyþnymynge / and wyþ-oute lere. Vor huanne þe oþre ssolle fayli / þise ssolle ous bleue. Þanne byeþ hi zuo propreliche oure : þet we his ne moȝe naȝt lyese wylle we nolle we. ase we moȝe þe oþre. Þe þridde scele and þe heȝeste is. uor þer byeþ yefþes clenliche be loue. and þou wost wel þet yefþe lyest þane name of yefþe: huanne hit ne is naȝt y-yeue clenliche be loue. Vor huanne þe yeuere heþ ziȝþe to his oȝene prou : þet ne is no yefþe : ac raþre is chapuare. Huanne he yzyȝþ guodnesse onderuonge / oþer seruice / þet ne is no yefþe / ac hit is raþre dette y-yolde. Ac huanne þe yefþe comþ propreliche and clenliche [MS. chenliche] of þe welle of loue wiþ-oute prou. wyþ-oute yefþe. wyþoute drede. wyþ-oute enie dette : Þanne is hit ariȝt ycleped / yefþe. Huerof þe filosofe zayþ. þet yefþe / is yeuynge: wyþoute ayen-yefþe. þet is wyþ-oute onderstondinge of ayenyefþe. ac wyþoute more : uor to zeche loue. Ine zuyche manere god yefþ ous his yefþes clenliche / uor þe loue þet he heþ to ous / and uor to gaderi oure herten. and oure loue. and uor þise scele : propreliche hi byeþ y-cleped / yefþes.