The University of Michigan Library provides access to these materials for educational and research purposes. These materials are in the public domain. If you have questions about the collection, please contact [email protected]. If you have concerns about the inclusion of an item in this collection, please contact [email protected].
DPLA Rights Statement: No Copyright - United States
Þet uirtue is worþssipuol: þet myȝt þou ysy ine þise manere. Zyx þinges byeþ ine þise wordle moche [typographic Fol. 24. a.] ywylned / uor þet hit þingþ þet hy byeþ moche worþssipuol. uayrhede. wyt. prouesse. myȝte. vridom. and noblesse. Þise byeþ zix wellen of ydelnesse. Þanne ydele blisse is to moche. Vayrhede / is þing mochel
yloued. uor þet is þing moche yworþssiped. And naȝt uorþan uayrhede þet þe eȝe of þe bodye yzyȝþ / and loueþ. is þing uals / ssort. and ydel. Vals: yef he ne is uayr. ne þe ilke uayr. ac oure eȝen byeþ fyeble / þet ne zyeþ bote þet skin wyþ-oute. Þanne huo þet hedde þe zyȝþe ase heþ þe lynx / þet me clepeþ oþerlaker : leucernere. þet yzyȝþ þorȝ þane wal alouer. ha ssolde yzy openliche / þet non uayr body / ne is : bote a huyt zech uol of donge stynkinde. and ase a donghel besnewed. Efterward þis uayrhede is ssort. uor zone hit fayleþ and ualouweþ ase þet flour of þe uelde / anon ase þe zaule him todelþ. al þe uayrhede þet / þet body heþ: þe zaule hit yeaf. and uor þe zaule he hit heþ. Þeruore he is fol / þet of uayrhede of bodie him gledeþ. Ac þe uayrhede of þe zaule: is uayrhede ariȝt / þet alneway wext and neure ne ssel fayly. Þet is þe zoþe uayrhede / hueruore þe zaule to god likeþ / and to þe angles þet yzeþ þe herte. Þis uayrhede yelt / and yefþ / to þe zaule: grace. and uirtue. and loue of god. uor hy reformeþ / and agrayþeþ / and him yelt his ryȝte pryente. þet is þe ymage of his sseppere / þet is uayr wyþ-oute comparysoun. and þet best him anlykneþ: mest is uayr. þanne þet uayreste þing þet ys onder god : is þe zaule / þet heþ parfitliche his riȝte ssepþe / and his riȝte briȝtnesse / colour of flour. briȝtnesse of [MS. os] zonne. ssepþe of man. lykynge of preciouse stones. And al þet þe eȝe of herte yzyþ of uayr : is uoulhede and uelþe / to þe zyȝþe of him. and al þet me may onder gode þenche of uayr: hit ne may naȝt by ycomparisoned to him.