ÞE OÞER GODES HESTE.
Þe oþer heste / ys þellich. "þou ne sselt nime / godes name: in ydel." þet is to zigge: " þou ne sselt zuerie / uor naȝt / and wyþ-oute guode scele." þet oure lhord him-zelf / ous uorbyet / ine his spelle. þet me ne zuerie / ne by þe heuene / ne by þe erþe/ ne by oþre ssepþe. þaȝles ine guode skele / me may zuerie / wyþ-oute zenne. ase ine dome / huer me okseþ / oþer / of zoþe. oþer out of dome / in oþre guode skele. and clenliche / and skeluolliche. Ine non oþre manyere / ne is no riȝt to zuerie. And þeruore / huo þet zuereþ wyþ-oute skele / þane name of oure lhorde / and uor naȝt: yef he zuereþ uals / be his wytinde : he him uorzuerþ. and deþ / to ayans / þise heste. and zuerþ dyadliche. uor he zuerþ / ayens inwyt. þet is to onderstonde / huanne he him uorzuerþ / be þoȝte / and be longe þenchinge. Ac þe ilke þet zuereþ zoþ / be his wytinde / and alneway uor naȝt. oþer uor some skele kueade / naȝt kueadliche / ake liȝtliche / and wyþ-oute sclondre : zuereþ liȝtliche. þaȝles þe wone / is kueaduol / and may wel wende / to zenne dyadliche / bote yef him ne loki. Ac þe ilke / þet zuereþ hidousliche be god / oþer by his halȝen / and him to-breȝþ / and zayþ him sclondres / þet ne byeþ naȝt to zigge: þe ilke zeneȝeþ dyadliche. Ne he ne may