Dan Michel's Ayenbite of Inwyt : or, Remorse of conscience : Richard Morris's transcription now newly collated with the unique manuscript British Museum MS. Arundel 57, volume 1, text / by Pamela Gradon.

OF ÞE LESSE GUODES.

Þe midel guodes / byeþ of kende: and of techinge. Of kende: ase uayrhede of bodye. prouesse. strengþe. zuyfthede. myldenesse. clyer wyt. sleȝþe. onderstondynge. and alle zuyche guodes þet kende berþ. Be techinge : ase grat clergye. ine alle oþre guodes: þet me wynþ be studye / oþer be guode wone / ase byeþ guode þeawes / and zome uirtues. Ac þise ne byeþ naȝt yet ariȝt þe zoþe guodes: uor hi ne makeþ naȝt þane / þet hise heþ uollyche guod. Vor manye filozofes / oþer of greate clierkes [MS. cherkes] / and of kynges / and of emperours / þet hedden moche of zuyche guodes: byeþ ydampned ine helle. Efterward / zuyche guodes yefþ oure lhord

alsuo to his uyendes: ase he deþ to his uryendes. to sarazyns / and to ualse cristene : ase to þe guode. Efterward / hit ne is naȝt zoþ guod / þet fayleþ / and þet me may lyese wylle he nolle he. and þet þieues ne moȝe stele. ne robbere benime. alneway ate ende: dyeaþ his benymþ. Efterward / zoþe guodes helpeþ eche daye / and ne harmeþ neure. Ac uorzoþe zuyche guodes / and zuiche graces wyþoute: doþ ofte kuead / and harmeþ ham / þet hise habbeþ / bote hi hise ne wel usy. And huanne hi ham yelpeþ / oþer hi ham prodeþ / and oþren hy onworþeþ. Vor þe ilke to huam [typographic Fol. 23. b.] god heþ yyeue þe ilke graces / and þe ilke guodes / þet ich habbe beuore ynemned god uor to serui. and helpe his nixte. bote yef he hit ne vsy treueliche: he ssel by ine þe more gratter torment. and straytlyche him behoueþ rekeni. and yelde scele to god / ate daye of dome. [MS. domo] of þet he heþ ydo. and of þet he heþ ywonne / of þe guodes þet god him heþ ylend: uor to mory.