The University of Michigan Library provides access to these materials for educational and research purposes. These materials are in the public domain. If you have questions about the collection, please contact [email protected]. If you have concerns about the inclusion of an item in this collection, please contact [email protected].
DPLA Rights Statement: No Copyright - United States
Hy clepieþ þe smale guodes : þe guodes of time / þe guodes of fortune hap. and þe leuedy fortune : went hare hueȝel eche daye / and benymþ / and yefþ. and went þet is aboue : beneþe. þet byeþ þe smale stones of gles ssynynde. and þe conioun his bayþ uor rubys. uor
safyrs. oþer uor emeroydes. þet byeþ as iueles to children. þet god ous yefþ / ous to solas. and uor oure loue: to draȝe to him. uor þet he wot þet we byeþ fyeble / and tendre. and hyealde we ne moȝe his. efterward / wayes of pouerté / of zorȝe / and of martirement / ase deþ þe guode godes knyȝt. þet þane kyngdom of heuene payneþ be strengþe to wynne be his prouesse. Þanne þise ne byeþ : ne grete guodes / ne smale aryȝt. Þanne wes a fol Iesu crist goddes zone. þet cheas pouerte. and ssame. an efterward : he uorzok / blisses. worþssipes. and richesses : yef þet byeþ þe zoþe guodes. Þanne ne byeþ naȝt / alle zoþe guodes ine heuene. Þanne ne is naȝt god parfitliche yblyssed : þet ne vzeþ naȝt zuyche guodes. þanne is god ontrewe / and onkende / þet þise guodes benymþ his urendes. and hise yefþ more largeliche : to his yuo. yef þet byeþ zoþe guodes : þanne weren foles alle þe halȝen. and alle þe wyse clerkes. and þe greate filosofes. þet þise guodes beuloȝe / and onworþede / ase dong. Yef þet byeþ zoþe guodes: þanne lyeȝþ god / þet lyeȝe ne may : and holy wryt. þet hise clepeþ / leazinges. and ssed. and metinges. and uanites. nettes. and bendes. and þe dyeules grines. and þet is zoþ / aze pater noster. Vor þet byeþ þe dyeules ginnes. huer-by þe zaules ine a þousond maneres he gyleþ / and nymþ / and bynt / and halt.
[Fol. 23. a.]Ac þe wyse chapman / þet is þe guode man / þet þe holy gost alyȝt. be zoþe beknaulechinge / þet ouer al him knauþ / huet ech þing is worþ / and yzyȝþ hit riȝt wel. Hi onderstondeþ / þet al þe wordle ne is naȝt a guod snode: uor mannes herte to uelle. and þet þer is moche kuead : and litel of guod. And þeruore huo þet lokeþ þe perils / and þe kueades þet þer byeþ / and wyteþ þet hit is zoþ : þet hi conne zigge. he þet ne yefþ / þet he loueþ: he ne nymþ / þet he wylneþ. Hy makeþ to god ane handuol. uor hi yeueþ þe wordle: uor heuene. naȝt / uor al. hor : uor gold. and leteþ al uor
god. richesses. lostes. worþssipes. and becomeþ poure. Þet is þe uayriste lyf / an þe zykeriste : þet is ine þise wordle.
Þe oþre byeþ / þet yzeþ / þet ine uele maneres hi moȝe do hare prou / of guodes of time. þet me may hise habbe : ak naȝt to moche louye. Vor god ne hat naȝt / al to lete. hy hise ofhyealdeþ: ac litel hise prayzeþ. hi hise uzeþ : ac litel his louyeþ. ase dede saynt Abraham. Iob. and dauiþ. and uele oþre. þet þe perils beuloȝe: and deden hire profit / of þe guodes þet god ham lende : hi couþen begge heuene. hi couþen hire zennen uorbegge. and helpe hare nyxte. Hi coþen more louye god / and herye / and þonki. worþssipie. drede. and yleue. uor þe greate perils huer hi byeþ / and ham zelue þe more bouȝe / huanne hi yzeþ hare fieblesse / and hire poure loue / and hare defautes. huanne þane strayte way ne dorren guo. huanne zuo lyte wylleþ uor god þolye / and yeue / þet zuo moche þolede / and let uor ham / yef hi wel ham wytyeþ / ak strang hit is. Vor hit is wel liȝter þing: alle þe guodes of þe wordle lete / at on tyme uor god: þanne his ofhyealde / and naȝt louye.