Page 43
ÞE ZEUENDE BOȜ OF AUARICE.
Þe zeuend boȝ / of auarice: ys wyckedhede. Ich clepie wychkedhede: huanne þe man / is zuo wykhed / and zuo moche dyeuel: þet him ne dret naȝt / to done / ane greate zenne / dyadlich / and orrible. oþer grat harm / to oþren / uor a lite wayn / oþer uor ureme / to him. Þes boȝ / heþ manye tuygges. Þe uerste is. huanne / eny uor drede / or pouerte. oþer uor couaytise / uor to wynne: uorzaȝþ renayþ god / and þe cristene bileaue. and becomþ bougre. oþer ieu. oþer sarasin. To þise zenne / belongeþ / þe zenne: of ham / þet uor pans / makeþ to clepie / þane dyeuel. and makeþ þe enchauntemens. and makeþ to loky ine þe . zuord. oþer ine þe nayle / of þe þoume. uor to of-take / þe þyeues. oþer uor oþre þinges. And of ham alsuo / þet makeþ / oþer porchaceþ / be charmes / oþer be wychecreft. oþer be kueadnesse / huet þet hit by. þet uolk / þet byeþ ine spoushod / togydere / ham hatieþ. oþer ne moȝe habbe uelaȝrede / þe on wyþ þe oþre / be spoushod. Oþer þet uolk / þet ne byeþ naȝt ine spoushod: louieþ ham togidere / folliche: and be zenne. Þe oþer is / þe zenne / of grochinge / and of traysoun bezuykinge. huanne þe man / uor wynnynge. oþer uor mede / deþ þing / huer by hi draȝeþ oþre / to þe dyaþe. oþer be zuorde. oþer be uenym. oþer ine oþre [typographic Fol. 12. b.] manere / huet þet hit by. Þe þridde / is þe zenne of ham / þet uor wynnynge / berneþ hous. tounes. casteles. cites. oþer cherchen. oþer destrueþ þe vines. oþer cornes. oþer doþ oþre harmes uor mede. Þe uerþe is þe zenne of ham þet zaweþ discord. and purchaceþ þe stryfs / and þe werres in cites / oþer ine capiteles / oþer be-tuene þe heȝemen / uor þan þet hi weneþ þe more to wynne mid strif ine þe werre : þanne ine pays. þe vifte is þe zenne of reuen. of prouostes. of bedeles. of sergons. þet accuseþ / and chalengeþ þet poure uolc / and ham