ÞE UERÞE BOȜ OF AUARICE.

Þe uerþe boȝ of auarice / is acsynge. þet is to yerne opo*. [ope?] oþre / mid. wrong. to þise zenne belongeþ / al þet barat. alle ualshedes. and alle gyles: þet comeþ / ine plait. Ine þis clergie / heþ dame auarice / uele scolers. and of clerkes: and of leawede. and specialliche / zeue manyeres of uolke. þet alle / þus studieþ. Þe uerste byeþ / þe ualse playneres / þet makeþ / þe ualse bezechinges. and zecheþ / þe ualse demeres. and lang time. and þe ualse wytnesses. þe ualse playteres. þe ualse lettres uor to greui oþren. and trauayleþ þet uolk / myd wrong. oþer be cristene cort. oþer be leawede cort. Þe oþre byeþ / þe ualse yulemde / þet vlyeþ. and naȝt þet / þet ziȝt is. and zecheþ wyþsettin [supplied by ed.] gges and respit. uor to bynime oþren / hare oȝen. Þe þridde byeþ / þe ualse wytnesses. þise makeþ / þe ualse mariages. þise benimeþ / þe heritages. þos doþ / zuo moche kuead / and harmes / þet non / ne may his amendi. and al þis hi doþ / be hare greate couaytise. Þe uerþe byeþ / þe ualse plaiteres / þet onderuongeþ / an sostinet / þe Page  40 ualse causes / be hare wytinde / and hise beclepieþ uor ssepe / and uor yefþes. þet hi nymeþ ariȝthalf / and alefthalf. and ofte lyese / þe guode playntes / be hare kueadnesse / oþer uor onconynghede / oþer be sleawþe / miswendeþ þe riȝtes / and doȝ*. [doþ] alle þe wronges / vor hare couaytise / ase þo þet byeþ maystres of gyle / and of contak / and of be-uelynge. Þe vifte. byeþ / þe ualse notaryes / þet makeþ þe ualse lettres. and ualseþ þe celes. rnakeþ þe kueade libelles. and to uele oþre / ualshedes. Þe oþre byeþ / þe ualse demeres. þet ham zelue hongeþ / more of one half / þanne of anoþre / be yefþes / oþer be behotinges / oþer be byddinges / [typographic Fol. 11. b.] oþer uor loue. oþer uor wreþe / oþer uor drede. and onbyndeþ þe playntes / mid wrong. And doþ maki þe greate costes / and nimeþ / þe greate yefþes / oþerhuyl / of þe on: oþerhuil / of þe oþren / oþerhuyl / of on / and of oþre. and zelleþ / hare domes. oþer ham / leteþ yworþe. And doþ / to þe poure men / greate harmes / þet hi ne moȝe amendi. Þe oþre byeþ / þe kueade bezide-zitteres / þet yeueþ þe kueade redes / to þe demeres / and makeþ lyese þe playntes : uor þe seruices / þet hy habbeþ. Alle þe persones / beuore yzed / byeþ y-hyealde to yelde / þet hi habbeþ y-het kueadliche / of oþren. and hare harmes / þet þe oþre habbeþ y-het / be ham.