ÞE 6 POYNS OF SLEUÞE: ÞET BRENGEÞ MAN TO HIS ENDE.

And yet eft / þer byeþ / zix poyns / kueade. huerby sleuþe brengeþ man / to his ende. Þe uerste is / onboȝsamnesse. huanne þe man / nele do / þet me him zayþ / ine penonce. oþer me him hat zomþing / þet [typographic Fol. 9. b.] him þingþ hard. he him excuseþ: þet he hit ne may do. oþer yef he hit onderuangþ: he hit deþ / oþer litel / oþer naȝt. Þe oþer poynt / is inpacience. uor ase he ne may / no þing bere / be boȝsamnesse. he ne may þolye / be paciense. zuo þet non / ne dar to him speke / of his Page  34guode. Þe þridde / is grochynge. Vor huanne me spekþ to him / uor his guode: he him wreþeþ / and grocheþ. and him þingþ: þet me him onworþeþ. and þerof he ualþ / in-to zorȝe / þet is / þe uerþe vice. An zuo moche / him ouergeþ / þe ilke zorȝe / þet al / þet me him zayþ / al þet me him deþ / al þet he yherþ / al þet he ziȝþ : al hit him tieneþ. and zuo he ualþ / in-to zorȝe / and into tyene to libbe / zuo þet him-zelf / him hasteþ / and wylneþ / his dyaþ. and þis is þe vifte vice. Efter alle þise zorȝuolle poyns of sleuþe / him yefþ þe dyeuel / þane strok dyadlych / and deþ him / into wanhope. þeruore he porchaceþ / his dyaþ / and him-zelue / slaȝþ. ase despayred. and him yefþ / alle kueadnesses / to done / and him ne dret naȝt / to do zenne / huet þet hit by. To zuich ende / let sleauþe*. [MS. sseauþe.] þane man. Þise byeþ. xviij. poyns. þet þe dyeuel / þrauþ / ope þane sleuuolle. hit ne is no wonder / þaȝ he lyese þet geme.