Dan Michel's Ayenbite of Inwyt : or, Remorse of conscience : Richard Morris's transcription now newly collated with the unique manuscript British Museum MS. Arundel 57, volume 1, text / by Pamela Gradon.

ÞE ÞRIDDE HEAUED OF ÞE KUEADE BESTE.

Þe þridde heaued / of þe beste / is hate. Ac þou sselt ywyte / þet þer is an hate / þet is uirtue. þet þe guode man heþ / aye þet kuead. An oþre / þet is zenne wel grat. þet is felhede / of herte. huerof comeþ / uele boȝes. and heȝliche: uour. by þe uour werreres / þet þe feloun heþ. þe uerste is / to him-zelue. uor huanne man / him berþ hate / to þe torment / and þe zaule / and þet body / zuo þet man / ne may slepe ne none reste habbe. Oþerhuyl / him be-nimþ þane mete / and þane drinke. and makeþ him ualle / ine ane feure /

oþer ine zuiche zorȝe: þet he nimþ / þane dyaþ. Þet is a ver / þet wasteþ / alle þe guodes / of þe house. Þe oþre werre / þet þe feloun heþ: þet is to gode. Vor wreþe / and felounye / op-bereþ / and nimþ zuo / oþer- huyl / þe herte of þe felle / uor zome aduersité timlich / oþer uor ziknesse / oþer uor dyaþ / of urendes. oþer uor zome misual / þet his wyl / ne is naȝt y-do : þet ha grocheþ / aye our lhord. and euele þonkeþ god / and his halȝen / and zuereþ / and blasfemeþ / aye god / and his halȝen. Þe þridde werre / þet þe wreþuolle heþ. is to þan / þet byeþ onder him. þet is / to his wyue / and to his mayné. Vor þe man / is oþerhuyl zuo out / of [typographic Fol. 8. b.] his wytte: þet ha beat / and smit / and wyf / and children / and mayné. and brekþ potes / and coppes / ase ha were / out of his wytte. and zuo he is. Þe uerþe / is werre / wyþ-oute / to his neȝybores / and to his nixte / þet byeþ alle / aboute him. And of þise boȝe / wexeþ zeue smale boȝes. Vor huanne wreþe arist / betuene tuay men: þer is uerst chidinge / and þanne wreþe / þet blefþ ine herte. effterward / wreþe. efterward comþ ofte strif. efter wylninge of wreche. efterward / oþerhuil manslaȝte. and efterward / oþerhuil werre dyadlich / be-tuene þe urendes / huerof comþ / ofte / to moche kuead / and perils / þet ne moȝe / naȝt by amended. Vor huanne þer is werre / betuene tuaye men : hit yualþ ofte / þet þer byeþ moche uolke dyade / þet ne habbeþ nenne gelt. cherchen tobroke. tounes uorbernd. abbeyes. priories. bernes destrud / and men / and wyfmen / and children deserited / and y-exiled. and londes destrud. and to moche / of oþre harmes / þet byeþ y-do / be þe encheyson / of þan / þet hi byeþ yhealde / uor te amendi / þet / þis purchaceþ. and þe lhord / and alle þo / þet byeþ to ham helpinde. an ine zuyche nyede. and þeruore hy byeþ / ine greate balance / of hyre helþe / of zaule. uor hi ne moȝe

amendi / ne yelde : þe harmes / þet hi habbeþ ydo. and hit behoueþ yelde: oþer hongy.