The University of Michigan Library provides access to these materials for educational and research purposes. These materials are in the public domain. If you have questions about the collection, please contact [email protected]. If you have concerns about the inclusion of an item in this collection, please contact [email protected].
DPLA Rights Statement: No Copyright - United States
Þet oþer heaued / of þe kueade beste: is enuie. þet is þe eddre / þet al / enuenymeþ. Enuie / is moder / to þe dyaþe. vor by þe enuie / of þe dyeule: com dyaþ / to þe wordle / þet is þe zenne / þet mest ariȝt / makeþ man / ilich þe dyeule: his uader. Vor
[typographic Fol. 7. b.] þe dyeuel / ne hateþ / bote oþres guod. and ne loueþ / bote oþres harm. and zuo deþ / þe enuious. þe en- uious / ne may ysy / þet guod of oþren / nanmore / þanne þe oule / oþer þe calouwe mous / þe briȝtnesse / of þe zonne. þe ilke zenne / him to-delþ / ine þri boȝes / heȝliche. Vor þe ilke zenne / anuenymeþ / alþeruerst / þe herte / of þe enuious. and efterward / þane mouþ and efterward / Þe workes. Þe herte of þe enuious / ys enueuymed / and suo miswent. þet he ne may / oþre manne guod / yzy / þet hit him ne uorþingþ / wyþinne þe herte. and demþ kueadliche. and þet he yziȝþ / oþer þet / he yherþ : nimþ hit to kueade wytte / and of al / makeþ his harm. zuo moche / þet to þe herte / of þe enuious / þoȝtes uenimouses / of uals dom / þet me ne hise may telle. Efterward þanne / þe enuious y-herþ / oþer yzyþ / oþremanne kued / huet þet hit by / oþer kuead of bodye / ase dyaþ / oþer ziknesse. oþer kuead of auenture hap. ase pouerté / oþer ad- uersité. oþer kuead gostlich / ase huanne he yherþ / þet zome / þet me hyelde guode men: ys y-blamed / of zome vice. Of þelliche þinges / him gledeþ ine his herte. Efterward / huanne he yziȝþ / oþer yherþ / þe guod of oþren. by hyt / guod of kende / oþer guod of hap / oþer guod of grace / huerof we habbeþ / aboue y-speke: þanne him comþ / a zorȝe to þe herte / þet he ne may by ine reste / ne maky glednesse / ne uayr semblant. Nou þou miȝt ysy / þet þe venimouse herte / of þe enuiouse / zeneȝeþ generalliche: ine þri maneres. ine ualse demynges. ine awrȝede glednesse. ine worse zorȝes. alsuo he zeneȝeþ by þe mouþe. Vor hit be-houeþ / þet zuich wyn / yerne by þe teppe: ase þer is / ine þe tonne. And uor þet / þe herte / wes uol of uenym: hit behoueþ / þet hit lheape / out be þe mouþe. Þanne of þe mouþe / of þe enuious / comeþ out / þri manere wordes uenimouses. huerof spekþ dauiþ / ine þe sautere. þet "þe mouþ / of þe enuious: is uol of
corsinge / and of biterhede / an of bezuykynge." Of corsynge: uor þe guodes of oþren / he missayþ / and hise lesseþ / alsemoche / ase he may. Of byterhede : uor þe kueades / of oþren / he hise moreþ / and arereþ / be his miȝte. Of bezuykyinge. vor al þet he yziȝþ / oþer yherþ: he went hit to kueade / and hit demþ / ualslyche. Efterward / þe enuious / heþ þri maneres / of uenim ine dede: ase he heþ / ine mouþe / and ine herte. uor kende / of þe enuious: is to wiþdraȝe / and uor to destrue / be his miȝte : alle guod / by hit lite / by hit lesse / by hit uoldo. þanne is he / of þe kende / of þe baselycoc. uor no grenhede / ne may yleste / beuore hym. ne in gerse / ne in busse / ne in trauwe. þanne by þe godspelle : þet corn heþ þri stas. [stapes?] uor hit is uerst ase ine gerse / afterward : ine yere. efterward / is uol of frut / and al ripe. Alzuo þer byeþ zome / þet habbeþ guod ginninge / wel uor to libbe / and to profiti / and byeþ ase ine gerze. þe ilke / him payneþ / þe enuious / uor te kuenche / yef he may. Þe oþre byeþ / ase ine yere / þet wel floureþ / ine guode / and profiteþ. by hit to god : oþer to þe wordle. and þo rebeleþ / þe enuyous / uor to ssende / and to destrue: be hys myȝte. Þe oþre byeþ uol-mad / and ine grat stat / and doþ moche guod / [typographic Fol. 8. a.] to god / and to þe wordle. Vor þet guode los / to abatye: and hyre guodes to loȝy / þe enuious agrayþeþ / alle his gynnes. Vor þe more / þet þe guodes byeþ greate : þe more zorȝeþ / þe enuious. Þis zenne / is zuo perilous: þet onneaþe / me may / come / to riȝte uorþenchinge. Vor þet hi ys contrarious / to þe holy goste / þet is welle / of alle guode. And god zayþ / ine his spelle / þet huo þet zeneȝeþ / aye þane holy gost : he ne ssel-neure habbe merci / ine þise wordle / ne ine þe oþre. uor he zeneȝeþ / of his oȝene kueadnesse. and me ssel ine þet / hollyche ouderstonde. Vor þer ne is / no zenne zuo grat : þet god ne uoryefþ / ine þise
wordle / yef man him uorþingþ / and byt merci / uor þe zenne. þet werreþ / be his miȝte /þe grace / of þe holy gost. ine þet he werreþ / oþremanne guod gostlich / ase þe yewes / werrede Jesu crist / uor þe guodes / þet he dede.