The University of Michigan Library provides access to these materials for educational and research purposes. These materials are in the public domain. If you have questions about the collection, please contact [email protected]. If you have concerns about the inclusion of an item in this collection, please contact [email protected].
DPLA Rights Statement: No Copyright - United States
Þe zixte boȝ of prede : is ypocrisye. þet is a zenne / þet makeþ to ssewy / þe guod wyþ-oute / þet ne is naȝt / wyþ-inne. Þanne byeþ þo / ypocrites / þet makeþ ham guode men / and ne byeþ naȝt. þet makeþ more strengþe / to habbe þane name of guod man: þanne þe zoþnesse: and þe holinesse. And þis hire to-delþ / ine þry. Vor þer is / an ypocrisye / uoul. and anoþre / fole. and þe þridde / sotil. Þo byeþ / uoule ypocrites / þet doþ / hyre uoulhedes / ine halkes: And
sseaweþ ham guode / to-uore þe uolke. Zuiche clepeþ / oure lhord: berieles ypeynt. and y-gelt. Þo byeþ / fole ypocrites / þet yncȝ ham lokeþ klenliche / to þe bodye / and doþ manie penonces / an guode. principalliche: uor þe los / of þe wordle. uor þet / me halt ham / guode men. þo byeþ wel foles. uor / of guod metal: hy makeþ / uaise moneye. Þo byeþ ypocrites / sotyls. þet sotilliche / wylleþ heȝe cliue. and steleþ / þe dingnetes / and þe baylyes. Hy doþ / al þet guod man ssel do: zuo þet no man / ne may his knawe / al-huet þanne / þet hi byþ uol wexe / and heȝe ycliue / ine dyngnetes. And þanne / sseweþ hy þe kueades / þet were / y-hole / and yroted / ine þe herte. þet is to wytene: prede. auarice. malice. and oþre kueade dedes. huer-by me knauþ aperteliche : þet / þet trau / nes neure guod. and þet hit wes/ al fayntise/ and ypocrisye: al þet he hedde beuore y-ssewed. Þeruore / hit is zoþ yzed. "Ne sselt þou neure y-wyte / huet man ys: alhuet he ys / þer he wyle by."