Dan Michel's Ayenbite of Inwyt : or, Remorse of conscience : Richard Morris's transcription now newly collated with the unique manuscript British Museum MS. Arundel 57, volume 1, text / by Pamela Gradon.

ÞE iij BOȜ OF PREDE.

Þe þridde boȝ of prede: is / arrogance. þet me clepeþ / opweninge / oþer opniminge. þanne þe man / wenþ more / of him-zelue / þanne he ssolde. Þet ys to zigge : þet wenþ by / more worþ: þanne he by. oþer more may: þanne he moȝe. oþer more conne : þanne he can. oþer wenþ by more worþ. oþer more moȝe. oþer more conne: þanne eny oþer. þis zenne / is þe strengþe / ofþe dyeule. vor he lokeþ / and norisseþ / alle þe greate gostliche zennes. Þis zenne him sseaweþ / ine uele maneres, oþer be dede / oþer be speche. ac nameliche / ine zix maneres. þet is to wytene / ine onlepihede. uor þe proude / and þe ouerwenere / weneþ more by worþ / oþer conne: more þanne enie oþre. and ne dayneþ naȝt do / ase oþre / þet more byeþ worþ / þanne he by. ac raþre / wile by / onlepi ine his dedes. Þet is þe uerste zenne / be huam ouerweninge is ine dede.

Þe oþer is / fol niminge / of greate spendinge. þet me clepeþ prodigalité. huanne he deþ to moche despense. oþer / of his oȝen: oþer / of oþre manne: uor to by / y-praysed. and þeruore / þet me him hyalde / þe more large / and þe more corteys.

Þe þridde kuead / þet comþ of ouerweninge: ys fole opniminge of uals strif. ase zayþ / Salomon. þet is to zigge. huo þet mimþ / a uals strif anhand / and wot wel / þet hit is uals. and hit uolȝeþ.

Þe uerþe tuyg / of þe ilke boȝe / huer-by / þe proude / sseaweþ prede / of his herte : is yelpingge. þet is / wel uoul zenne / and to god: an to þe wordle. Þe yelpere is þe cockou. þet ne kan / naȝt zinge / bote of him-zelue: [typographic Fol. 6. a.] þis zenne is ybounde ine þan / þet be his oȝene mouþe / him yelpþ. oþer of his wytte. oþer of his kenne. oþer of his workes. oþer of his prouesse. Ac he him dobleþ ine ham / þet þe yelpere / and þe lozeniour / zecheþ / and redeþ / and yefþ ham of his / uor ham to praysi. and uor to zigge of ham: þet hi / ne dorre naȝt zigge. and uor to lyeȝe of ham : and te grede hare noblesse.

Þe vifte out-kestinge / of þe ilke stocke / is scorn. Vor þet is þe wone / of þe proude: ouer-wenere / þet him ne is naȝt ynoȝ / to onworþi / ine his herte / þe oþre. þet ne habbeþ naȝt / þe graces / þet he wenþ habbe. ac makeþ / his bisemers / and his scornes. and þet wors is: bisemereþ and scorneþ þe guode men. and of ham / þet he yziȝþ / wende to guode. þet is wel grat zenne. and wel dreduol. Ac / uor hire euele tongen: hi miswendeþ / moche uolk / to done wel.

Þe zixte kestinge out / of the ilke boȝe: is wyþ-stondinge. Þet is / huanne þe man wyþstant / to alle ham: þet guod / him wolde. Vor þe proude / ouer-wenere: yef me him wiþnimþ : he him defendeþ. yef me him chasteþ : he is wroþ. yef me him wel ret. he ne lefþ nenne / bote his oȝene wyt. Hit is a perilous ziknesse / þet ne may naȝt þolye: þet me him take. and to þan / þet alle medicines: went in to uenim.