Page 16
ÞET UERSTE HEAUED OF ÞE BESTE.
Þet uerste heaued / of þe beste of helle: ys prede. Þet oþer / is enuie. þe þridde / wreþe. þe uerþe / sleauþe / þet me clepeþ / ine clergie: accidye. þe vifte / icinge. in clergie / auarice. oþer couaytise. þe zixte / glotounye. þe zeuende lecherie / oþer luxurie. Of þise zeuen heauedes / comþ ech manere zenne. and þeruore / hi byeþ y-cleped / haued-zennes. uor þet hi byeþ / heaued / of alle kueade / and of alle zennes. and ginninge / of all kueade. be hy dyadliche / be hy uenial. Þanne / ech of þe ilke zeuen him to-delþ / ine uele halues. And uerst / we willeþ zigge / of þe zenne of prede / uor þet wes þe uerste zenne / and þe aginninge / of alle kueade. vor prede / brek uerst uelaȝrede / and ordre / huanne liȝtbere þe angel / vor his greate uayrhede / an his greate wyt: wolde by aboue / þe oþre angeles / and him wolde enmi / to god / þet hine zo uayr / an zuo guod: hedde y-mad. And þeruore / he vil uram heuene: and becom dyeuel. and he / and al his uelaȝrede. Hym anlikneþ / alle proude / þet uelaȝrede / and ordre of men / ondeþ / and brekþ / huanne hi wylleþ / by aboue oþren. and more by alozed / and y-preyzed / þanne eni oþer / þet betere byeþ worþ.