LXXXVIII.
Augurrium. Sicut supra.
Josephus tellis þat when̛ Herod̛ come vnto Cesarie & aƚƚ þe men̛ of þe contre come vnto hym̛, he had on̛ clothyng of clothe of golde & syluer. So on̛ a day he satt in þer mote-haƚƚ, & þe son̛ bemys shane opon̛ his clothyng. & þai þat saw hym̛ thought at þer was ij sonnys, one at schane on̛ hym̛, & a noder at shane oute of hym̛; & so þai tuke a grete ferdness for hym̛, to so mekuƚƚ at þai said̛ on̛ þis maner of wise; "hedertoward̛ we dred yone man̛ bod as a man̛, bod fro hyne-furtℏ we saƚƚ wurshupp̛ hym̛ abown̛ þe natur of man̛"; vnto so mekuƚƚ þat, þurgℏ þe adulacion̛ of þe pepyƚƚ, he supposid̛ hym̛ selfe more for to be a god þan̛ a man̛. So on̛ a day as he satt vnder-nethe a tre, he was war of ane owle syttand in þe tre abown̛ his head̛; and þerby he wiste þat he sulde sone dy, & said̛; "Lo! surs, I, þat am̛ your lord̛, mon̛ now dy." For he knew be þe sight of þis owle, þat he sulde dy with-in v dayes after. And onone he was smytyn̛ with seknes, and v dayes wormes knew hym̛ so in his bowels þat at þe laste he [MS. de.] expired̛ & dyed̛.