Alphabet of tales : an English 15th century translation of the Alphabetum narrationum of Etienne de Besançon, from Additional MS. 25,719 of the British Museum / by Etienne de Besançon

DCCXLII.
Tactus. Tangi debet mulier nec a sanis nec ab infirmis.

Saynt Gregur tellis how som tyme þer was a preste, & þer was giffen̛ hym̛ a kurk and he governyd̛ it with mekuƚƚ drede, whilk [Latin MSS. qui ex tempore ordinis suscepti presbiteram suam ut sororem diligens, sed ut pestem fugiens, &c.] þat fro he had furste tane ordurs he luffid̛ passynglie presbiteram suam, for in that contre evur-ilk a preste hath a wyfe, bod he fled hur as he wold̛ hafe done pestelens, and wulde not suffre hur com̛ nere hym̛. And when̛ he had bene xl^ti yere preste, a grete ffevurs tuke hym̛ so þat he was bown̛ to dye & tuke a passion̛ of dead̛. And when̛ his wyfe saw that, sho made grete sorow & went he had dyed. And sho lenyd̛ down̛ hur mowthe vnto his at luke if any brethe war in hym̛, and when̛ he felid̛ hur he spak vnto hur & sayd; "Go away fro me, womman̛, ffor yit þer is a sparke of lyfe in me, & þerfor remefe away þe caff at it burn̛ not!"

• ... Tactus mulieris movet carnem viri. Supra Leonis pape.
• ... Taxillus. Taxillorum ludus displicet deo. Supra de ludo.

• ...
• ...Taxillorum ludus est aliquando causa blasfemandi deum. Supra de blasfemia.