DCCXXI.
Societas malorum fugienda est.
Petrus Alphonsus [MS. Alphunsus.] tellis how on̛ a tyme ij clerkis went samen befor̛ a place þer þar̛ was many drynkers, and þai callid̛ þaim in. And þe tone of þaim went into þaim, & þe toder wold̛ nott bod went on̛ hys wais; and it was fer with-in nyght. So þe wachis of þe town̛ fande aƚƚ þies drynkers syttand samen, & þe clerk with þaim, & becauce a man̛ of þe town̛ was robbid̛ þat nyght, þai tuke þaim aƚƚ & þe clerk with þaim, & hanged̛ þaim. And þe clerke at bade with þaim, or he was hanged̛, sayd̛ on̛ þis maner of wyse; " Quisquis inique gentis consorcio fruitur, procul dubio mortis immerite penas lucratur. What som̛ evur he be at vsis iƚƚ company, na dowte of he saƚƚ hafe ane iƚƚ dead̛."