DCXCV.
Sacramentum honorauerunt apes.
Cesarius tellis how som̛ tyme þer was a womman̛ þat had many beis, & oft sithes þai dyed̛ opon̛ hur. So þer was ane þat cownceld̛ hur at sho sulde gett þe sacrament and̛ lay in þe hyfe emangis þaim. So on̛ a day sho went vnto þe kurk̘ and shrafe hur, & fenyd̛ at sho wolde be howseld̛, and so sho was. And onone as sho was howseld̛ of þe prestis hand̛, whils he turnyd̛ hym̛ vnto þe altar, sho withdrew þe sacrament oute of hir mouthe & had it hame & laid̛ it emang hur [MS. his.] beis. And onone þai knew þer Maker, & with þer wark̘ in þe hyfe þai made a little chapeƚƚ & þerin þai made ane altare, and abon̛ þis altar̛ þai layde þe sacrament, and afterward̛ fro thens furtℏ þai encresid̛ gretelie. So on̛ a tyme þis womman̛ oppynd̛ þe hyfe, and fande þe wallis, þe wyndows, þe rufe & þe steple, þe duris & þe altar of þis chapeƚƚ, aƚƚ made be beis as þai wurke. And sho went and shewid̛ it vnto þe preste & vnto hyr neghburs, and þe preste sersyd what was þerin, & fand þe sacrament. And he & aƚƚ his parisshyn̛ with greate ioy & mirthe [MS. repeats, & ioy.] had it vnto þe kurk̘. And þe womman̛ grawntid̛ hur syn̛ & was shrevyn̛ agayn̛, and reseyvid̛ þe same sacrament.
- ...Sacramento possunt adaptari multa que dicuntur supra de sacerdote, eukaristia, communione, et cibo spirituali.