DCXC.
Sacerdos diligenter debet aduertere quod hostia
consecranda nullum habeat defectum.
Cesarius tellis how som tyme þer was a preste besyd Colayn̛, and when̛ he was att mes & had sayd̛ þe gospeƚƚ & layde down̛ þe sacrament vppon̛ þe corprax, sodanlie it was away. And he trowid̛ at þat had happend̛ þurgℏ som̛ fallyng down̛, & he layd̛ þer a noder; and onone þat was removid̛ ferrer þan̛ þe toder was. And þan̛ he tuke þe thrid̛, and onone it was casten̛ of þe altar̛. And when̛ he saw þat he was ferde for þat hoste behynd̛ hym̛, and he consecratt a noder. And when̛ mes was done, he tuke þis hoste & broght it vnto Colayn̛, & shewid̛ it vnto parfite men̛ & rehersid̛ vnto þaim aƚƚ þe mater. And þai brak it aforn̛ hym̛ and fand þerin a lowse baken̛. And aƚƚ þat was þer thankid̛ almighti God̛ þat wiƚƚ algattis at þe sacrament be made of clene thyng.