DCLXXXV.
Ridere non debent aduertentes pericula
mundi.
We rede in 'Libro de Dono Timoris' how som̛ tyme þer was a kyng, and if he made nevur so great a feste, he wolde neuer lagℏ. So a frend̛ of his reprovid̛ hym̛ þerfor, & askid̛ hym̛ whi he did so, and he ansswerd̛ fenandlie. So after-ward̛ he ordand a chayre with rotyn̛ fete, and he garte sett it abown̛ a hate burnyng oven̛, and abown̛ it he gart̘ hyng a swerd̛ with a wayke threde. And þis done, he garte se t hym̛ þerin þat reprovid̛ hym̛ for he wolde not lagℏ, & he garte sett aboute hym̛ iiij men̛ with iiij drawen̛ swerdis. And he garte bryng befor̛ hym̛ aƚƚ maner of delicious metis & drynkis, & aƚƚ oþer thyngis þat sulde make hym̛ merie. So þan̛ þe kyng come in and stirrid̛ hym̛ to lagℏ, and he ansswerd̛ agayn̛ & said̛; "I may not lagℏ when̛ I se þies perels þat er aboute me." Than̛ þe kyng ansswerd̛ hym̛ agayn̛ & said̛; "Than̛ vmthynk̘ þe how mot I lagℏ when̛ þer er grete festis made afore me, þat seis behynd̛ me þe bitternes of my syn̛? And befor̛ me I se ane vncertantie of þat at is for to com̛, and on̛ my lefte hand̛ I see vexacions of present aduersities, and on̛ my right hand I se noyes þat commys after prosperities. And aƚƚ þies I se as sharp̛ swerdis of þe sentans of aƚƚmyghti God̛. And I se dead̛ hyng abown̛, whame I wate nevur what howr̛ wiƚƚ stryke me, and vndernethe me I se þe pitt of heƚƚ at I am̛ ferd̛ at faƚƚ into, & with-in me I se myne awn̛ freletie. And emang aƚƚ þies I am̛ sett in a frele seatt, oute of þe whilk I am̛ ferde daylie to faƚƚ. And þefor̛ hafe þou no merveƚƚ if I may not fynd in my harte to lagℏ."
- ...Rosa. Rose habentur tempore hyemali. Supra de martirio.
- ...Rusticus delicijs nescit vti. Supra de delicijs, ij et iij.
- ...Rustico falsum denarium offerenti, idem ei pro communione exhibetur. Supra de oblacione.