DCXLIX.
Prodigalitas multa mala facit.
Seutonius tellis how þat Nero þe emperour was so statelie þat he trowed̛ þe frute of [MS. repeats, of.] riches and of money was no nodur þing bod ordynance made for a mans expens, vnto so mekuƚƚ at he wuld nevur were a garment twyce, and he wold̛ fyssℏ with a nett made of gold̛ wyre, and aƚƚ þe duris of his pales was made of evurye & enowntid̛ with precious oyntementis. And he had rownd̛ chawmers þerin, þat day & nyght turnyd̛ abowte as þe firmament duse. And yit at þe laste hym̛ þoght he had not tresur enogℏ, bod he gart punyssℏ and sla dyvers ryche men̛ at he myght hafe þer gudis.