DCXLVIII.
Presumptuosum est verb[a] subtilia et alta loqui.
We rede in 'Dictis Patrum' [MS. repeats, we rede.] of ane ankyr, when̛ he come vnto þe cetie of Pemenen, þer was a gude man̛ reseyvid̛ with gladnes hym̛. And as þai satt, þis ankyr began̛ to talke of holie writt, and of privaties of hevyn̛. And þan̛ þis olde man̛ turnyd̛ his face vnto a noder of his brethir, and wold̛ nothyng ansswer þis ankyr; and so he went furtℏ and was passand hevye. So a disciple come vnto þis olde abbott & sayd̛; "For þe come þis man̛ hedur, þat had grete myrtℏ at home in his awn̛ place, and þou dedeynys not now to speke vnto hym̛." This olde abbott ansswerd̛ hym̛ ayeyn̛ & sayd̛; "He is a man̛ of hie placys, & spekis aƚƚ of hevynlie thyngis; and I am̛ a man̛ of law place, and vnnethis I may vnderstond erdlie thyngis." And þis dissiple went furtℏ & tolde þis ankir what he said̛. And he was gretelie compuncte here-with, & went in-to þis olde abbott agayn̛ & said̛ vnto hym̛; "What shall [MS. shat.] I do, ffadur abbott? For þe passions of my sawle hase lordschup̛ on me." And þan̛ þis old̛ abbott had ioy of hym̛ & sayd̛; "Now þou erte welcom̛, fadur. Oppyn̛ þerfor̛ my mowthe and I saƚƚ fulfyƚƚ it with þi gudis." And with þis wurd̛ þis ankir was gretlie comfurthid̛ & sayde; "Forsuthe it is a gude way at þou holdes, & a trew." And þan̛ he thankid̛ þis olde abbott & went agayn̛ vnto his awn̛ region̛.
- ... Presumptuosus frequenter credit habere gratias quas non habet. Supra de cantu So the Latin versions. The English MS. has cantiri. et de obediencia.
- ...Princeps debet esse compositus in aspectu. Supra de aspectu.