DCXXVII.
Petri Martiris.
We rede in his Legend how on̛ a tyme when̛ he was at þe cetie of Melayn̛ [Lat. MSS. Apud Mediolanem.] & prechid þer, he disputid̛ with a maister þat hight Hesiarcha [Harl. MS. et quemdam magistrum heresiarcham examinante.] in presens of aƚƚ þe prelattis of þe cetie. And þis Hesyarcha said̛ vnto hym̛; "O! þou fraward̛ Petur! And þou be als holie as þies fond̛ peple trowis, whi prayes þou noght þi God̛ to putt a clowde betwix þaim & þe son̛, at þai dye nott for so grete hete as þai d[oo]?" And þis Petur ansswerd̛ hym̛ agayn̛ & said̛; "And þou wiƚƚ promytte me at þou shaƚƚ renownce þine heresie, I shaƚƚ do as þou hase axkid̛." And þe heretykis, trowyng at þat myght not be done, cryed oppon̛ þis maister, and bad hym̛ make a promys. And yitt he wolde nott. Neuer-þe-les þis Petur, to shew þe power of almightie God, and at He was former of al thyngis visible and invisible, made his prayer & made a cros agayn̛ þe son̛; and þer apperid̛ betwix þe son̛ & þe peple a little clowde like a tent þat coverd̛ þe peple fro þe son̛. And befor̛ þar̛ was no clowde in aƚƚ þe ayre.