DCXVI.
Penitencia pocius est hic facienda quam in
futuro.
Iacobus de Vetriaco tellis & says; "Som̛ tyme I saw a holye womman̛ whilk þat when̛ sho was long dead̛, or hur body was beryd & layd in ertℏ, hur sawle turnyd̛ agayn̛ vnto hur bodye. & sho had grawntid̛ at sho suld̛ liff styƚƚ in þis werld̛, and sho sulde suffre in purgatorie penans for hur syn̛ & sho wold̛, & if sho wold̛ not, sho suld̛ suffre penance in þis werld̛: & sho tuke hur to suffre penance in þis werld̛. So a long tyme, as God wold̛ [MS. repeats, a long tyme, here.] , sho was gretelye turment, to so muche at sho wold̛ som tyme weltyr in þe fyre, and som̛ tyme in wynter sho wolde lay hur down̛ in frosyn̛ watyr & lay hur þer a long while; and̛ som̛ tyme sho was constreynyd̛ to entyr dead mens gravis. So at þe laste sho had grace grauntid̛ of almyghtie God̛ at sho was oft sythes ravysshid̛ in hur spyritt at sho led̛ dyvers tymys þe sawlis of þaim at wer dead̛ into purgatorie, & thrugℏ purgatorie, & sho had no hurte, vnto þe kyngdom̛ of hevyn̛."
- ...Penitere potest interdum unus pro alio. Infra de satisfaccione.