DXCVIII.
Paciens bonum pro malo reddit.
We rede in 'Gestis Iohannis Elemosinarij' how on̛ a tyme when̛ a cussyn̛ of his had a grete wrang of a tavurner, & when̛ he made playnt vnto þe patriarke, he mott gett no comfurtℏ, and þe patryarke said vnto hym̛; "Who is he att dar gaynsay þe or oppyn̛ his mouthe agayns þe? Truste, son̛, vnto me, þat I shaƚƚ do to-day vnto hym̛ suche a thyng þat aƚƚ Alexandria saƚƚ hafe merveƚƚ þeroff." And when̛ he hard̛ þis he tuke a grete comfurtℏ, & trowid̛ þat he wold̛ gar hym̛ be grevuslie betyn̛. And þan̛ when̛ Iohn̛ saw he tuke a grete comfurtℏ, he kyssid̛ his breste & said̛; "Son̛, & þou will be cussyn̛ vnto my mekenes, þou bus make þe to be betyn̛ & suffr̛ stryfe & debate of ilka man̛, for a trew thoght is nowder of flessℏ nor blude, bod it is knowyn̛ of trewtℏ of þe mynd̛." & onone þai sent for þis man̛, and he made hym̛ fre of al maner of tributt & pension̛. And aƚƚ þat evur hard̛ þis had grete mervayle and vnderstude what he ment when̛ he sayd̛; "I saƚƚ do vnto hym̛ suche a thyng þat aƚƚ Alexandria shaƚƚ hafe merveƚƚ þeroff."