DXC.
Oracioni corde est attendendum.
Saynt Ierom̛ tellis how þat when̛ Hillarion̛ had lefte aƚƚ maner of oþer þingis and was giffen̛ alonelie vnto his prayers, he sufferd̛ many snybbis of þe fend̛; & when̛ he was in his prayers þe fend̛ apperid̛ vnto hym̛ in many lyknessis. So it happend̛ on̛ a tyme when̛ he was in his prayers, becauce he wolde be lett with no maner of sight, he sett hym̛ down̛ on̛ his kneis & on̛ his elbowys, & layd̛ his face down̛ vnto þe ertℏ. And onone þe devuƚƚ come & sett hym̛ stridlyngis on his bakk̘, & dang hym̛ in þe sydes with sharpe spurris, & laid̛ on̛ his head̛ with a swip̛ & said̛; "Wharto syttys þou þus scornand̛ & nappis?" And he was als hevy on̛ his bakk as it had bene a grete sekk fuƚƚ of barlie.