DLIX.
Nicholaus scolarem suscitauit.
We rede in his 'Meracles' how þer was a gude man̛ þat vsid̛ yerelie, becauce of a son̛ þat he had þat was a scolar, apon̛ Saynt Nicholas day for to make a grete feste, & dele grete almos in wurshup̛ of Saynt Nicholas. So þe devuƚƚ had a dispite þeratt, & come to þe dure in a pure mans liknes, & axkid̛ almos vppon̛ þe Saynt Nicholas day. And þe gude man̛ sent hym̛ almos with þis scoler, and þer þe devuƚƚ strangeld̛ þe childe & kyllid̛ hym̛. And when̛ þe fader come vnto þe dure and fande his son̛ dead̛, he made mekuƚƚ sorow & had vp þe dead̛ childe in-to a chambr̛, and sett hym̛ down̛ on̛ his kneis & made his complaynt vnto Saynt Nicholas, & said̛; "Loo! Saynt Nicholas! behold̛, is þis your reward̛ of þe wurshup̛ þat I hafe þis many day done vnto you?" And as he was þus complenand̛ þe childe oppynd̛ his ene & rase vp̛ & was olyfe agayn̛.